Endama Konseya PYDê Foza Yûsif di kongreya yekemîn a Meclisa Jinan de got: “Rola jinê di avakirin û pêşengtiyê de girîng û çarenûs e. Meşa pîroz bi pêşengtiya jinan gerek dewam bike, heya serkeftin mayînde bibe.”
Di bin dirûşma “Jina birêxistinkirî misogeriya civaka demokratîk e”, Meclisa Jinan a Tevgera Civaka Demokratîk (TEV-DEM) Kongra xwe ya yekemîn li ser asta herêma Bakur û Rojhilatê Sûriyeyê li hola Serdem a bajarê Hesekê ya Kantona Cizîrê li dar xist. Di kongreyê de 375 delege ji sazî, dezgeh û rêxistinên jinan, Rêveberiya Xweser, partiyên siyasî û parêzer amade bûn.
Di kongreyê dê axaftin, nirxandina rewşa siyasî, nirxandina rewşa rêxistinî, xwendina rêzknameya meclisê û hilbijartin pêk tê. Piştî deqeyek rêzgirtinê, Hevseroka Tevgera Civaka Demokratîk TEV-DEM Remziya Mihemed lidarxistina kongreya yekemîn a Meclisa Jinan a Tevgera Civaka Demokratîk pîroz kir û got: “Ji destpêka şoreşê ve heya îro rola Tevgera Civaka Demokratîk di pêşxistina vê şoreşê de esas bû. Li pey wê hêzeke mezin a jinan hebû, ji bo birêxistinkirina xwe û civaka xwe her kêlî di nava têkoşîn û berxwedanê de bûn. Jin sembola şoreşa me ne û her kes wan ji bo xwe mînak dibîne. Em ê her dem mohra xwe li dîrokê bixin û pêşengiya pêngavan bikin heya ku bikaribin civakek demokratîk û azad ava bikin. Em ê civakek ku jin tê de paşguh nebin, bi rengê jinan û pêşengiya wê Sûriyeya nû ava bikin.”
‘Alozî bi rêbazên pevçûnê nayê çareserkirin’
Kongre bi nirxandina rewşa siyasî ji aliyê endama Konseya Partiya Yekitiya Demokartîk (PYD) Foza Yûsif ve berdewam kir. Foza Yûsif da zanîn ku dewletên hegemon li gorî berjewendiyên xwe dixwazin temenê aloziyê dirêjtir bibe û wiha berdewam kir: “Herêma me gelek aloz e û diyar e ev alozî dirêj be. Ji ber ku gelek plan hene. Li Rojhilata Navîn pevçûna leşgerî û birdozî dewam bike, bê guman Sûriye yek ji perçeyên esasî ye û her kes dixwaze nifûza xwe li Sûriyeyê xurt bike. Aloziya ku li herêmê derdikeve, bi rêbazên pevçûnê nayê çareserkirin. Ji bo çareseriyê, pêwistiya me bi belavkirin û gihandina paradîgmaya me li tevahî cîhanê û bi taybetî li Sûriyeyê heye. Mîsogerkirina jiyanek aram û demokratîk, rola herî sereke ye ku dikeve ser milê jinê. Rola jinan di avakirin û pêşengtiyê de girîng û çaranûs e. Di şoreşa Rojavayê Kurdistanê de jinê rolek girîng di pêvajoya parastin û tekoşînê de lîst, heya ku gihşt vê encamê.”
‘TEV-DEM di pêşveçûnê de xwedî rolek girîng e’
Foza Yûsif balkişand ser girîngiya xwerêxistinbûnê û wiha got: “Em bi pêvajoyek nû re rûbirû dimînin, gelek girîng e ku em xwe li her derê xwe birêxistin bikin. Ji ber ku TEV-DEM di pêşveçûnê de xwedî rolek girîng e. Em rêxistinên hevbeş ava bikin û bi rastî bi jinên Sûrî re ji bo pêşeroja Sûriyeyê û mîsogeriya mafê jinê hevgirtinek xurt bidin avakirin. Îro li Sûriyeyê mafên jinan di xeteriyek mezin de ne, destûra ku ji aliyê hikûmeta demkî ve hat pêşkêşkirin, mafê jinê û hebûna wê, her wiha mafê pêkhate û civaka Sûriyeyê piştguh dike. Li perava Sûriyeyê jin tên revandin, qetilkirin û destdirêjî li ser wan pêk tên. Em wekî tevgera jinê, van kiryaran şermezar dikin û berpirsyariya me, em xwedî li van jinan derkevin. Li kuderê mafên jinan tên binpêkirin, gerek em bibin dengê wan û hêza parastina wan, yê ku herêma me ji van kiryaran diparêze rêxistinbûyîna me ye. Pêwîst e em xwe bighînin her jinek û birêxistin bikin da ku em xwe ji xeteriyê biparêzin.”
‘Yekitiya jinan girîn e’
Foza Yûsif anî ziman ku belavkirina zanista Jineolojî, çareserî ye û wiha got: “Di vê pêvajoya hesas de pêwîst e jin zanista azadî û jineolojî li her derê belav bike da ku em bikaribin çareseriyê mîsoger bikin. Ev zanist dê hemû jinan ji komkujî, mafxwarin û binpêkirinê xilas bike. Peymana civakî ya jinan ku li Bakur û Rojhilatê Sûriyeyê gerek bibe peymanek civakî ya tevahî jinên Sûriyeyê, em destûra ku hebû û rola jinê red dike, em wê qebûl nakin û Sûriyeya nû dê bi zanista jina azad ava bibe. Ji bo ku em van gavan bavêjin, pêwîst e em têkoşîna xwe ya hiqûqî û parêzeran bilind bikin da ku lêpirsîn û lêkolîn were kirin ku çawa em bikaribin mafê xwe di Sûriyeyê de bidest bixin û biparêzin. Ji ber ku rêxistinbûyîna hiqûqî û yekîtiyan gelek girîng in.”
‘Doza Hevrîn Xelef doza me ye’
Foza Yûsif di berdewama axaftina xwe de helwesta jinan a li dijî erkdarkirina Hatim Ebû Şeqra ya di qada leşkerî de, pîroz kir û wiha got: “Doza şehîd Hevrîn Xelef Doza me ye. Ev kiryar xeteriya bi awayekî eşkere ye. Yekîtiya jinan, îsrara azadî û biryardayînê bilind bikin, meşa pîroz gerek bi vî rengî dewam bike da ku serkeftin mayînde bibe. Em xwe li gorî banga Rêberê gelê Kurd Abdulah Ocalan birêxistin bikin û têkoşîna xwe li ser du lingan bimeşînin jê avakirina aşîtî, aramî û demokrasî û ya din jî bihêzkirina qada leşkerî.”
