Parlamenterê DEM Partiyê yê Riha Ferît Şenyaşar êrişên li ser Rojavayê şermezar kir û got: “Dilê gelê Kurd li Rojava ye. Em ê bi ruhê berxwedana Kobanê bimeşin sînorê Rojava.”
Li çar perçeyên Kurdîstanê û welatên Ewropayê gel li dijî êrişên li ser Rojava daketine qadan û çalakiyên girseyî li dar dixin. Gelê Kurd li her derê li dijî êrîşên li ser Rojava çalakiyan li dar dixe û şermezar dike. Li navçeya Pirsûsê ya Rihayê jî dê di 22yê Çile de li dijî êrişên li ser Rojavayê meşeke girseyî bê lidarxistin. Gel dê li navçeya Pirsûsê kom bibe û heta sînor bimeşe.
Parlamenterê Partiya Wekhevî û Demokrasiya Gelan (DEM Partî) Ferît Şenyaşar li dijî êrişên li ser Rojavayê şermezar kir û ji bo piştgiriya Rojava gel vexwend meşa Pirsûsê.
‘Tirkiye şerê taybet dimeşîne’
Ferît Şenyaşar da zanîn ku ew li sînorê Kobanê Pirsûsê ne û wiha got: “Dîsa şereki qirêj li ser gelê Kurd ê li Rojava, tê meşandin. Divê em Kurd şiyar bin û bibin yek. Di sala 2014an de jî DAIŞê êrîşî bajarên Rojava kir. Li dijî êrîşên DAIŞê yên li ser Kobanê gelê kurd ji çar parçeyên Kurdistanê li sînorê Pirsûs-Kobanê kom bûn. Gel li Kobanê xwedî derket û şerê gel li Kobanê bi ser ket. Niha dîsa şerekî çekdarî hem jî şerekî taybetî tê meşandin. Şerê çekdarî DAIŞ dimeşîne, şerê bi taybet jî dewleta Tirkiye yê dimeşîne. Ew ê ku êrişan dikin hemû çeteyên DAIŞê ne. Em dixwazin hemû Kurd li vê berxwedanê xwedî derkevin û şiyar bin. Rojava hebûn û tunebûna Kurdan nîşan dide.
‘Dilê Kurdan li Rojavayê ye’
Ferît Şenyaşar destnîşan kir ku Tirkiye bi balafirên bê mirov ê biçêk ve êrişîn Kurdan dikin û got: “Dilê Gelê Kurd li Rojavayê ye. Tirkiye bi balafirên bê mirov ê biçek û endamên SMOyê êrişî gelê Kurd dikin. Em ji dewleta Tirkiyê re dibêjin pêvajoya aştiyê li Tirkiyeyê tê meşandin lê li Rojavayê komkujiyê dikin. Ku aştî û wekheviyê dixwazin divê pêşiyê hebûn û statuya gelê Kurd qebûl bikin. Kurd ji bo Ereb û Tirkan ne gef in.”
‘Em ê bimeşin sînor’
Ferît Şenyaşar herî dawî bal kişand ser meşa Pirsûsê û û got: “Divê herkes tevlî vê meşê bibe. Gelê Kurd azadiya xwe dixwazin, aştiyê dixwazin û jiyaneke bi rûmet dixwazin. Di 2014an de çawa me bi rûhê Kobanê li ber xwe da. Em ê di 22yê mehê de jî li ser sînorê Pirsûs Kobanê bimeşin. Em bang li gelê Kurd dikin. Em êrîşan qebûl nakin û şermezar dikin.”
