Hevserokê Giştî yê DBPê Keskîn Bayindir di çarçoveya banga Abdullah Ocalan a “Aştî û Civaka Demokratîk” de bi Suryanan re hat cem hev. Keskîn Bayindir anî ziman ku felsefeya Rêberê Gelê Kurd Abdullah Ocalan, modêla wekhevî, azadî, îdarî û siyasî pêşkeşî wan dike.
Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) bi gel re civînan pêk tîne. DEM Partî û DBP di çarçoveya “Banga Aştî û Civaka Demokratîk” a Rêberê Gelê Kurd Abdullah Ocalan de civînan pêk tînin. DBP û DEM Partiyê li navçeya Midyadê ya Mêrdînê bi gelê Suryanan re li avahiya Federasyona Komeleyên Suryan (SUDEF) civîn pêk anî. Hevserokê Giştî yê DBPê Keskîn Bayindir, wekîlên DEM Partiyê û hevşaredar tev li bûn. Serokê SUDEFê Evgîl Turker ji ewil bi Suryankî axivî. Piştre jî ji bo kesên di Komkujiya Seyfo de hatin qetilkirin û kesên di têkoşîna azadî û demokrasiyê de jiyana xwe ji dest dane deqeyek rêz hate girtin. Piştre jî Hevserokê Giştî yê DBPê Keskîn Bayindir axivî. Keskîn Bayindir ewil kesên di Komkujiya Seyfoyê de hatine kuştin bibîr anî û wiha got: “Em hevdîtinên aştî û civaka demokratîk dikin. Ji bo me tiştekî gelek bi qîmete ku em bi gelê herî qedîm gelê Suryan re hevdîtinê dikin. Li ser vê xakê gelek êş hatin kişandin. Qirkirinên weke Seyfo û Ermenan li ser vê xakê hatin kirin. Tekane sedema vê jî feraseta yekziman, yeknetewe bû ku roleke sereke lîst. Ev yek bi fikrên Rêberê Gelê Kurd Abdullah Ocalan pêkan e. Fikrên birêz Ocalan û veguherîna wan a pergalê, di qiyameta Rojhilata Navîn de yek ji rêyeke xelasiyê ya gelên Kurd, Suryan, Ermen û hemû gelên din e.”
‘Modela jiyanê pêşkêş kir’
Kesîn Bayindir, li ser girîngiya banga Abdullah Ocalan jî rawestiya û wiha bi dawî kir: “Divê gel berpirsyartiya xwe bicih bînin. Ji bo hemû pirsgirêkên cîhanê çareserî diyar in. Bêhtir dewlet bêhtir pevçûn û tundî ye. Lê felsefeya birêz Ocalan, pêkvejiyanê û modêla wekhevî, azadî, îdarî û siyasî pêşkeş dike. Em xwedî wê hêzê ne ku vê perspektîfê li her devera Rojhilata Navîn bicih bînin. Em dibînin ku tiştê her yek ji me dikare bike hene. Em piştgiriyê ji gelê Suryan daxwaza dikin.”
Civîn piştî axaftinan ji çapemeniyê re girtî domiya.
