Amed – Serokê Şaxa Komeleya Mafên Mirovan (ÎHD) a Amedê Ercan Yilmaz têkildarî peyama ku Rêberê PKKê Abdullah Ocalan bi rêya şandeyê parve kir got: “Li aliyekî hêviya çareseriya pirsgirêka Kurd heye, lê li aliyê din dewlet êrişî Rojava dike û sivîlan dikujin û qeyûm tayîn dikin. 40 sal in li Kurdistanê mafên mirovan binpê dikin.”
Şandeya ku ji parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder pêk tê, di 28ê kanûna 2024an de çûn li Girtîgeha Ewlehiya Bilind a Tîpa F ya Îmraliyê bi Rêberê PKKê Abdullah Ocalan re hevdîtin kir. Piştî vê hevdîtinê, di 29ê kanûnê de peyama ku ji 7 xalan pêk hat bi raya giştî re parve kir. Şandeyê, piştî hevdîtina li Îmraliyê li ser daxwaza Abdullah Ocalan hefteya borî bi partiyên siyasî yên li meclisê û siyasetmedarên girtî re hevdîtin kirin. Li ser wan hevdîtina ji bo çareseriyek demokratîk, rayedarên dewletê li şûna gavan bavêje, her roj dewlet bi SÎHAyan êrîşî Bakur û Rojhilatê Sûriyê dike. Her roj operasyonên siyasî pêş dixin. Rojnamegeran binçav dikin û digirin. Qeyûman tayînî şaredariyan dikin. Ji ber êrîşên Tirkiyeyê zêdetirî 100 hezar şêniyên Şehba û Til Rifhatê koç kirin. Ji 27ê Mijdara 2024an heta niha 2 rojnameger, siyasetmedar, hunermen jî di navde zêdetirî 100 sivîl hatin kuştin. Li Serêkaniyê zêdeyî 100 welatî hatin revandin. Bi sîhayan her roj êrîşî Bendava Tişrînê dikin û dixwazin bendavê biteqînin. Her roj êrîşî firen nan, depoyên genim, stasyonên enerjiye dikin. Hikûmeta Tirkiyeyê hîn jî di şerê li dijî kurdan de israr dike û mafên kurdan binpê dike. Têkildarî êrîşên Tirkiyeyê û binpêkirinên mafan, Serokê Şaxa Komeleya Mafên Mirovan (İHD) a Amedê Ercan Yilmaz Ajansa
Welat re axivî.
Ercan Yilmaz destnîşan kir ku peyamên li îmraliyê bi raya giştî re hatin parvekirin ne nû ne û bi salane ji bo ku pirsgirêkan kurd bi rêya demokrasiyê bê çareserkirin Rêberê PKKê Abdullah Ocalan bang dike. Ercan Yilmaz, destnîşan kir ku Rêberê PKKê Abdullah Ocalan dixwaze rêya diyaloga bê vekirin û wiha axivî: “Di vê pêvajoyê de ev peyamên ku hat dayîn jî pir girîng e. Pirsgirêka kurd ne pirsgirêka îroyîn e. Dema ku Komara Tirkiyeyê ava bû Tirkiyeyê nexwast ku gelê kurd bi nasname û bi çanda xwe li ser welatê xwe bijî. Nexwest bibe xwedî statu. Ji ber vê jî di vê pêvajoyê de peyamên ku tên dayîn û hevdîtinên ku bi partiyên siyasî re tên kirin girîng e.”
‘Pêdivî bi gavên demokrasiyê heye’
Ercan Yilmaz da zanîn ku hemû kes ji bo aştiyeke mayînde bi hêviye û wiha got: “Li aliyekî hêviya çareseriya pirsgirêka kurd heye. Li aliyê din devlet êrişî Rojava dike. Her roj sivîlan dikuje û qeyûm tayin dike. Ev bi hevre nameşe. Divê devlet ji dil nêzî daxwaza kurdan bibe. Divê gavên demokrasiyê bavêje.”
‘40 sal in mafên kurdan binpê dikin’
Ercan Yilmaz bibîr xist ku Dewleta Tirk 40 sal in li Kurdistanê mafên kurdan binpê dike û wiha berdewam kir: “Ev hemû bi rapor, belge hatine çespandin. Ercan Yilmaz, anî ziman ku ew wek 35 şaxên ÎHDê dikarin tecrûbeyê xwe parvebikin û wiha pêde çû: “Ji bo aştiyek mayînde çi bikeve ser milên me em amade ne. Hewceye ku devlet ji bo naskirina mafên kurdan gav biavêje. Ji ber ku kurd jî xwediyê mafên xwe ne. Dewletê pirsgirêka kurd pêş xist. Ji ber vê yekê divê dewlet gav bavêje. Divê hemû partiyên siyasî û saziyên sivîl jî rola xwe ya çareseriyê bilîzîn.”
