Eleqeya ciwanên enternasyonalist a xwendina pirtûkên Rêberê Gelê Kurd Abdullah Ocalan her ku diçe zêde dibe. Di destpêkê de li nêzî 160 navendan pirtûkên Abdullah Ocalan hatin xwendin. Niha li gelek navendan bi gelek zimanan tên xwendin û niqaşkirin.
Pêngava “Ji Abdullah Ocalan re azadî ji pirsgirêka Kurd re çareseriya siyasî” bi xwendina pirtûkên Rêberê Gelê Kurd Abdullah Ocalan didome. Di çarçoveya pêngavê de ciwanên enternasyonalîst li dora pirtûkan kom dibin û xwe bi rêxsitin dikin.
Di 10ê Cotmeha 2023an de akademisyen, rojnameger, rêxistinên civaka sivîl, partiyên siyas, parlamenter, çalakgerên têkoşer, fîlozofên xelata Nobelê ya aştiyê wergirtine, nûnerên rêxistinên jinan û gelên herêmê yên ji tevahî cîhanê pêngava cîhanî ‘Ji Abdullah Ocalan re azadî, ji pirsgirêka Kurd re çareseriya siyasî’ dabûn destpêkirin. Pêngav li bajarê Strasbourgê yê Fransayê bi daxuyaniyekê hatibû destpêkirin. Dema ku nivîskar û akademîsyenan di 2023an de dest bi pêngavê kirin temenê Rêberê Gelê Kurd Abdullah Ocalan 74 salî bû. Ji ber 74 saliya Rêberê Gelê Kurd Abdullah Ocalan li 74 welatan dest bi pêngavê kirin û îro ev pêngav bi xwendina pirtûkan li tevahiya cîhanê belav bûye.
Di serî de li 160 navendan akademîsyen, nivîskar û rewşenbir ên dostên kurdan kom bûn û dest bi xwendina pirtûkên Abdullah Ocalan kirin. Li welatên mîna Bangladeş, Pakîstan, Japonya, Hindistan, Kenya, Afrîkaya Başûr, Amerîkaya Latîn û bi dehan navendên din ên cîhanê daxuyaniya piştevaniya pêngava “Ji Abdullah Ocalan re Azadî ji pirsgîrêka Kurd re çareseriya siyasî” dabûn destpêkirin. Piştî pêngav li cîhanê belav bû, çalakiyên curbecur ên wekî panel, forum û komxebat hatin lidarxistin. Hemû xebat û çalakî li ser fikr û felsefeya Rêberê Gelê Kurd Abdullah Ocalan hatin lidarxistin.
Piştî dest bi pêngavê kirin, Dostên Kurdan di 10ê Kanûnê de bi sernavê ‘Rojên xwendina pirtûkên Abdullah Ocalan’ pêngavek li li gelek navendên cihanê dabûn destpêkirin. Piştre li gelek welatan pirtûkên Abdullah Ocalan hatin xwendin. Bi taybetî li welatên mîna Almanya, Fransa û Îtalyayê pirtûk bi komî hatin xwendin. Ji bo ku her kes karibe ji pirtûkên Abdullah Ocalan bigire pirtûk bi 16 zimanan hatin xwendin. Însanên li hev kom bûn hin beşên parêznameyan xwendin û li ser van xwendinan niqaşên befireh kirin. Tê dîtin ku îro fikrên Rêberê Gelê Kurd Abdullah Ocalan li tevahiya cîhanê belav bûye.
Kampanya bi felsefeya “Ramanên ku zindanan hildiweşînin” û “Raman nayên sînordarkirin” li sedan navendê cîhanê pêk hat. Kampanyaya xwendinê li bajarên Cenevre, Basel, Zurîh û Bernê yên Swîsreyê û Bellînzonayê berdewam kir.
Li gelek navendên Îtalyayê li ser mijarê parêznameyên Rêberê Gelê Kurd Abdullah Ocalan, çalakî hatin lidarxistin. Di çalakiyan de beşên ji parêznameyan hatin xwendin û nîqaş hatin kirin. Li bajarê Hildesheîmê bi heman armancê li Navenda Civaka Kurd a Demokratîk çalakî hate lidarxistin. Di çalakiyê de beşên ji pirtûkên Rêberê Gelê Kurd Abdullah Ocalan bi Elmanî û Kurdî hatin xwendin û sohbet hatin kirin.
Li bajarê Frankfûrtê yê Elmanyayê bi beşdariya parêzer Mîlan Martîn derbarê berhemên Rêberê Gelê Kurd Abdullah Ocalan de panel hat lidarxistin. Piştî panelê ji parêznameyên Abdullah Ocalan beşên têkildarî AÎHM’ê hatin xwendin. Li Darmstadtê bi pêşengiya Meclîsa Jinê ya Roza, parçeyên ji Pirtûka 5an a Manîfestoya Şaristaniya Demokratîk a Rêberê Gelê Kurd Abdullah Ocalan hatin xwendin. Li Saarbrucken DKTMê ji aliyê TJK-Eê ve roja xwendinê hat lidarxistin û beşek ji parêznameyên Rêberê Gelê Kurd Abdullah Ocalan hat xwendin. Li Parîsê bi beşdariya komek akademîsyen, xwendekar û welatparêzan li Navenda Çanda Kurd a Ahmet Kaya, parçeyên ji parêznameyên Rêberê Gelê Kurd Abdullah Ocalan hatin xwendin. Zanyarê siyasetê Nîls Andersson, endama Jineolojiyê Sarah Marcha û enternasyonalîst beşdarî çalakiyê bûn. Di çalakiyê de parêznameyên Abdullah Ocalan bi Fransî hatin xwendin û nîqaş hatin kirin. Li bajarê Stockholmê yê Swêdê bi sernavê “Bi Ocalan re Diyalog” çalakiya xwendinê hat lidarxistin. Di çalakiyê de nîqaş hatin kirin.
Xwendina pirtûkan belav dibe
Herî dawî berga yekemîn a ‘Manîfestoya Şaristaniya Demorkatîk’ a Abdullah Ocalan bi sernavê ‘Kokên Şaristaniyê’ bi Swêdî hate weşandin. Pirtûka ku ji aliyê Rojavakommittéerna (Komîteya Rojava) ve hate wergerandin, bi hevkariya Federativ Förlag Heval Förlag û Weşanxaneya Meymanê hate çapkirin. Rojavakommittéernayê ragihand ku dê di navbera 12-14ê Nîsanê de li bajarên mezin ên Malmö, Göteborg û Stockholmê danasîna pirtûkê bê kirin.
Di vê pêvajoya dawî de li paytexta Yewnanistan Atînayê danasîna pirtûka Abdullah Ocalan a “Sosyolojiya Azadiyê” hat kirin. Pirtûka bi navê “Sosyolojiya Azadiyê” ku wergerî Yewnanî hat kirin, li paytext Atînayê gihîşt ber destê xwîneran.
Bi wesîleya rojbûna Abdullah Ocalan di navbera 4-10’ê Nîsanê de bi beşdarbûna bi sedan sazî û koman li pênc parzemînan û li dehan bajaran çalakiya 3yemîn Rojên Xwendina Pirtûkên Abdullah Ocalan a Cîhanî hate lidarxistin. Çalakiyên îsal, ji yên salên beriya niha cudatir ne bi xwendinên takekesî bi nîqaşên kollektîf, hevdîtinên felsefîk, lidarxistina çalakiyan û bangên hunerî hatin lidarxistin.
