Amed – Endamê Konseya Navendî ya TTB Mehmet Şerîf Demîr û Endama Komîsyona Mafê Mirovan a TTB Elîf Turana ku tev li kampanyaya TBBê bûn diyar kirin ku ji bo aştiyê amade ne û gotin: “Divê her kes piştgiriyê bide pêvajoyê.”
Bi pêşengiya Odeya Bijîşkan a Amedê 269 sazî û dezgehên civakî di 19ê Tirmehê de kampanyayek dan dest pêkirin. Saziyan bi vê kampanyayê xwestin piştgiriyê bidin pêvajoyê. Xwestin ku ji bo pêvajo bigihêje armancê divê her kes bixebite. Endamê Konseya Navendî ya TTBê Mehmet Şerîf Demîr, Endama Komîsyona Mafê Mirovan a TTB Elîf Turan jî tev li daxuyaniyê bibûn li ser armanca qampanyayê ji Ajansa Welat (AW) re axivîn.
‘Em jî aştiyê dixwazin’
Mehmet Şerîf Demîr diyar kir ku armanca qampanyayê ewe ku piştgiriyê bidin pêvajoyê û got: “Ew 40 sal in pirsgirêyek heye. Îro ji bo aştî dê pek bê. Pêvajo hatiye dest pêkirin. Aştî di navbera kesên şerê hev dikin de pêk tê. Em jî wekî saziyên civakî aştiyê dixwazin. Aştî ji her kesî re hewce ye. 269 saziyên civakî kom bûn. Û ji bo aştiyê çî deste wan bê amade ne. Divê gel, partiyên siyasî û saziyên civakî jî tev li pêvajoyê bibin.”
‘Ji bo aştî pêk bê divê dewlet gavan biavêje’
Mehmet Şerîf Demîr destnîşan kir ku aliyêkî ji bo aştiyê çêk şewitand û wiha bi lev kir: “Em saziyên civakî dibêjin divê dewlet jî gav biavêje. Ji bo aştiyê divê gavên şênber bên avêtin. Divê girtiyên nexweş bên berdan. Ji bo aştî pêk bê divê gav bên avêtin. Çiqas gav bêne avêtin em ê ji bibêjin pêvajo ji dil e.”
‘Bê saziyên civakî pêvajo pêş nakeve’
Elîf Turan bi bîr xist ku ji bo aştiyê pêvajo hatiye destpêkirin û ev tişt anî ziman: “Ji bo aştiyê wekî TTBê me qampanya da destpêkirin. Wekî ku tê zanîn di salan berê de jî pêvajo hatibû destpêkirin. Lê tu encam derneket. Em hêvî dikin ku ev pêvajo bigihijê encamê. Ji bo aştî pêk bê bar dikevê ser milê sazî û dezgehan. Em jî wekî saziyên pîşeyî piştgiriyê didin pêvajoyê. Em dizanin ku jiyanek bi rûmet, dê bi aştiyê pêk bê. Em dizanin ku aştî tunebe ev xwestin pêk nayê. Aştî tunebe û binpêkirina mafê mirovan heye, kes nikarê fikir û ramanê xwe bînê ziman. Bê saziyên civakî ew pêvajo nameşe.”
‘Tenduristiya gel bi aştiyê pêş dikeve’
Elîf Turan anî ziman ku aştî ji bo bijîşkan gelek giring e û got: “Tenduristî bi aşiyê pêkan e. Aştî pêş bikeve dê aliyê civak û siyasî jî pêş bikeve. Di nava aştiyekî mayinde de xala sereke tenduristiyê. Dema aştî pêş ket, wê demê em dikarin bibêjin tenduristî jî dê gelek baş be. Gava ku binpêkirina mafên mirovan hebe, di nava civakê de rewşa mirovan ne baş be em nakirin li ser tenduristiyê biaxivin. Ji bo wê aştiyêk mayinde ji bo bijîşkan gelek giring e.”
