Şirnex – Li Hezexê gerînendeyê dibistanekê Mesût Sonmez li dijî zarokekî destdirêjî kir. Lê tevî 3 meh borîn jî dozgeriyê têkildarî lêpirsînê îdeaname amade nekiriye.
Li Kurdistan û Tirkiyeyê her roj li dijî jin û zarokan destdirêjî tê kirin. Lê ji ber ku kesên destdirêjiyê dikin nayên darizandin û cezakirin, tacîz, tecawiz û kuştina jin û zarokan roj bi roj zêde dibe. Li gor agahî û belgeyên kedin destê Ajansa Welat, derket holê ku li navçeya Hezexê ya Şirnexê Gerînendeyê Dibistana Sereke ya bajaroka Erebanê Mesût Sonmez li dijî zarokê 15 salî A.D destdirêjî kiriye.
Heya niha 3 zarok bûne mijara lêpirsînê
Hate diyarkirin ku di platformên medya dijîtal de birayê A.D, B.D û hevalek din ê A.D ku navê wî D.K ye û ew jî 15 salî ye ji aliyê Mesût Sonmez ve rastî tscîzê hatine. Li gor encama lêpirsîna dozgeriyê di dema tacîza li ser platformên medya dijîtal de qeydên tacîzê jî hatine girtin.
Mesût Sonmez ji peywirê hatiye dûrxistin
Li gor belgeyên ku me bi dest xistine Gerînendeyê Dibistana Seretayî yê bajaroka Erebanê Mesût Sonmez piştî îfadeya A.D daye Dozgeriya Komarê ya Şirnexê, ew ji peywirê hatiye dûrxistin.
Hin derdor dixwazin destdirêjiyê veşêrin
Her çiqas li gor îfadeya A.D destdirêjî hatibe tespîtkirin jî piştî îfadeya dozgeriyê hin derdoran xwe gihandiye malbata A.D û xwestine A.D îfadeya biguherîne. Li gor belgeyên hatine bidestxistin daxwaznameyek ku tê îdeakirin bi destê A.D hatiye nivîsîn ji aliyê parêzerê Mesût Donmez ve radestî dozgeriyê hatiye kirin. Bi vê daxwaznameyê hin derdor dixwazin lêpirsîna hatiye destpêkirin were nixumandin û îdea ew e ku Dozgeriya Hezexê ji ber vê yekê îdeanameyê amade nake.
Dibe hejmara zarokan zêdetir bibe
Li ser lêkolîna ajansa me ya li navçeya Hezexê tê texmînkirin ku dê hejmara zarokên rastî tacîza Mesût Sonmez hatine zêdetir bibe. Heta niha 3 zarok bûne mijara lêpirsînê ya Dozgeriya Hezexê.
