Kurdistanî û dostên Kurdan ji bo azadiya fizikî ya Rêberê Gelê Kurd Abdullah Ocalan heta avahiya Serokwezîriyê ya li Berlînê meşiyan.
Kurdistanî û dostên Kurdan ên Elman li Brandenburger Tor a Berlînê kom bûn, ji bo azadiya fîzîkî ya Rêberê Gelê Kurd Abdullah Ocalan heta avahiya Serokwezîriyê meşiyan. Siyasetmedar Faysal Sariyildiz, Sîbel Yîgîtalp û Parlamenterê Dîe Lînke Ferhat Koçak jî tevlî çalakiyê bûn. Li vir axaftin kirin û piştre daxuyanî dan çapemeniyê. Di daxuyaniyê destnîşan kirin ku Rêberê Gelê Kurd Abdullah Ocalan 26 sal in li Girtîgeha Îmraliyê di bin tecrîdê de tê ragirtin û gotin, “Ev tecrîd ne tenê li derveyî mirovahiyê ye, di heman demê de zexta siyasî ye. Ev jî nîşan dide ku bê çiqasî ji fikir, raman û modela civaka demokratîk ditirsin. Ocalan ne girtî ye, ew pêşengê modela civaka demokratîk e. Di 27’ê Sibatê de banga çareseriya pirsgirêka Kurd kir. Careke din ji bo dawî li şer were, rêya çareseriya pirsgirêka Kurd nîşan da. Ev bang di heman demê de banga ji bo Kurdan, Tirkan, gelên Rojhilata Navîn û cîhanê ye.”
Çalakgeran di daxuyaniyê de destnîşan kirin ku Tevgera Azadiyê ya Kurd nîşan daye ku ji bo demokrasî, aştî û jiyana hevpar a hemû gelan cidî ye û tevî zext û tawanbariyan jî bi agirbesta yekalî pirek ava kiriye û gotin: “ Di nava lêgerîna diyalogê de ye û ji bo jiyana hevpar a aştiyane dixebite. Hikûmeta Elman gelek caran diyar kiriye ku ew dixwaze piştgiriyê bide pêvajoya aştiyê. Ji ber vê yekê em îro dipirsin; wê kengê li gorî sozên xwe tevbigere? Hikûmeta federal heta kengê wê xwe paşve bikşîne? Em li şûna piştgiriyê, bêdengiyê dibînin. Di vê mijarê de perpirsyariyeke taybet a Elmanyayê heye. Eger hûn bi rastî jî aştiyê dixwazin divê hûn daxwaza aştiyê bikin!”
Çalakgeran daxwazên xwe wiha anîn ziman:
“1. Abdullah Ocalan divê demildest bê berdan– ev gava yekem a pêvajoya diyalogê ya rasteqîne!
- Ji bo pêvajoya çareseriya siyasî zext û piştgiriya navneteweyî divê (bi taybetî jî Hikûmeta Federal)!
- Û dawî li krîmînalîzekirina çalakvanên Kurd ên li Elmanyayê bînin.”
Daxuyanî wiha bi dawî bû: “Heta ku tecrîda li ser Rêberê Gelê Kurd Abdullah Ocalan hebe, Tevgera Azadiyê ya Kurd were krîmînalîzekirin, edalet û aştî were astengkirin, em ê dengê xwe bilind bikin.”
Çalakî bi berzkiriina dirûşmên “Bijî Serok Apo” û “Ji Ocalan re azadî” bi dawî bû.
