Amed – Jinên ku di Hevdîtina Jinan a Ked, Çand û Hunerê ya Amedê de stand vekirin, diyar kirin ku jin bi keda xwe li ser lingê xwe disekinin û xwestin keda jinan bê dîtin.
Hevdîtina Jinan a Ked, Çand û Hunerê ya Amedê ku di pêşengtiya Serokatiya Daîreya Xizmetên Malbat û Jinan a Şaredariya Bajarê Mezin a Amedê li Qada Şêx Seîd dest pê kir wê sê rojan berdewam bike. Gelek kes tev li hevdîtina ku dê çand, ked û hunera jinan were nîşandayîn dibin. Her wiha gelek şaredarî, sazî û dezgehan standên xwe di vê hevdîtinê de danîn e û tiştên ku bi keda jinan hatine amadekirin li ser dezgehan in. Ev nîşandayîn ango hevdîtin xwerû keda jinan e. Jinên ku beşdarî hevdîtinê bûn e û standên xwe vekirin e ji ajansa me re axivîn.
‘Jin êdî dikarin debara xwe bikin’
Jina bi navê Hatîce Navcî diyar kir ku li Farqînê li ser navê Navenda Piştevanî û Jiyanê ya Jinan a Nûdemê stand vekirine û wiha axivî: “Ez mamosta dûrin û neqşê me. Me van tiştên li ser standa me bi xwendekarên xwe re çêdikin. Navenda me ev du meh in hatiye vekirin, di navendê de gelek kursên cuda hene. Jin li navendê hînî kar dibin. Jin bi van xebatan dikarin debara mala xwe bikin. Zarokên xwe xwedî dikin, çavê wan ne li destê zilaman e. Xebatên wisa pêşiya jinan vedikin. Ev 9 sal in min her sê zarokên xwe jî bi vî karî mezin kir. Qeyûm hat, me ji kar avêt lê me dîsa jî karê xwe li malê berdewam kir. Û me zarokên xwe dan xwendin. Ez ji jinan hemû re dibêjim ku hûn jî dikarin vî karî bikin û di bin destê meran de nemînin. Em dixwazin jin karên cuda cuda bikin. Jin gelek karan dikin lê keda jinan nayê dîtin. Divê şarêdarî karên wisa zêdetir bike ku keda jinan were dîtin.”
‘Em îro keda xwe didin nasîn’
Jina bi navê Halîme Akkûş da zanîn ku ew penêr, rûnê nivîşk, salçe, nanê tanûrê û zeyt li gund çêdike û ew li vir difiroşe û wiha axivî: “Şarêdarî di vê xebatê de me gelek kêfxweş kir. Em li vir tiştên ku jin çêdikin tên difirotin. Jin keda xwe didin nasîn. Şarêdariya Rezanê ji bo jinan tiştên gelek giring li dar dixe. Em îro dikarin bibêjin ku şaredarî ji bo jinan xebatan amade dike. Berê ku wextê qeyûman me tiştên baş ji bo jinan nedidît. Dema qeyûm hat kursên me girtin. Daxwaza me ev e ku şarêdariyên me dîsa vekin. Em jin dixwazin werin gel hev û xebatên xwe li dar bixin. Em dixwazin keda jinan li her derê were dîtin.”
