Amed – Endama Platforma Yekîtiya Jinên Kurd Zînet Dînçer li ser mijara “Kongreya Neteweyî” axivî û diyar kir ku divê jin pêşengiya avakirina kongreya neteweyî bikin.
Rêberê Gelê Kurd Abdullah Ocalan di hevdîtina 23ê Hezîranê de xwestibû ku Kongreya Neteweyî ya Kurd kom bibe. Piştî daxuyaniya Rêberê Gelê Kurd Abdullah Ocalan di nava gel de nîqaşa Kongreya Neteweyî dest pê kir. Endama Platforma Yekîtiya Jinên Kurd Zînet Dînçer têkildarî amadekariya Kongreya Neteweyî ji Ajansa Welat re axivî.
‘Kongreya Neteweyî gelek giring e’
Zînet Dînçer diyar kir ku yekrêzî ji bo gelê Kurd gelek girîng e û wiha got: “Me di konferansa 3yemîn a Yekîtiya Jinên Kurd de banga yekîtiya neteweyî li gelê Kurd kir. Ji bo vê Kongreya Neteweyî gelek girîng e. Piştî konferansê me dest bi karên kongereya neteweyî kir. Divê jînen Kurd bi rol û mîsyona xwe rabin. Ji ber ku di nav aştiyê de barê jinan gelek e. Di şer û pevçûnan de jin gelek êş kişandin e. Em banga Abdullah Ocalan gelek girîng dibînin. Êdî bila dayîk negirîn. Berî çend rojan salvegera şehadeta Şêx Seîd bû û tevahî partiyên siyasî bi yek dengî Şex Seîd bibîr anîn.”
‘Divê jin pêşengiya kongreyê bikin’
Zînet Dînçer da zanîn ku divê her aliyê Kurdistanê gel xwe di nava kongreyê de bibîne û wiha pêde çû: “Divê jin pêşengiya kongreye bikin. Jin wekî dayîk cihê xwe di kongreyê de bigirin. Em dibêjin ‘Kongreya Neteweyî’ ji bo vê divê her her kes xwe di kongreyê de bibîne. Kongre dê bandorê li tevahiya Kurdan bike. Tevahî cîhan wê bibîne ku Kurd mil bi mil in. Dengê Kurdan yek be wê ev jî bandorê li cîhanê bike.”
‘Çi werê ser milê me em ê bikin’
Zînet Dînçer destnîşan kir ku jinan kuştina zarokên xwe dîtin û axaftina xwe wiha dawî kir: “Tevahî jinan û dayikan gelek êş kişandin. Çi ji destê me were em ê bikin. Wekî Platforma Yekîtiya Jinên Kurd me biryar da ku çi bar bikeve ser milê me, em ê bikin. Em ê li ser gora Ehmedê Xanê konferansek pêk bînin. Tevahî partî û sazî dê werin nerînên xwe bînin ziman. Li vir hevdu hembêz bikin. Banga min ji pêşengên gelê Kurd re ev e; mil bidin milê hevdu. Em bi kongreya neteweyî ser bikevin.”
