Civînên gund û taxan ên têkildarî perspektifa Rêberê Gelê Kurd Abdullah Ocalan eleqeyek mezin dibînin.
Gel bi taybetî meraq dike ku dê ev pêvajo çawa pêş bikeve. Di civînan de zêde pirs tên pirsîn û dixwazin der barê pêvajoyê de rast bên agahdarkirin.
Her çend baweriya civakê ji dewletê nayê jî, gel ji fikr û felsefeya rêberê xwe bawer dike. Gel di civînan de dixwaze ev civîn tenê bi carekê bi sînordar nemîne û domdar bin. Dixwazin potansileya heyî baştir bi rêxistin û tevger bikin.
Li Amedê û gelek bajarên Kurdistanê hefteyek e li gund û taxên navçeyan civînên gel tên lidarxistin. Di civinan de têkildarî perspektifa Rêberê Gelê Kurd Abdullah Ocalan a Aştî û Civaka Demokratîk hem pêvajo tê nirxandin û hem jî li ser erk û berpirsiyariyên sazî, rêxistin û civakê niqaş têne kirin. Broşurên têkildarî Aşti û Civaka Demokratîk li welatiyan tê belavkirin. Li gundan û taxan tevlêbûn girseyî ye û eleqeyek mezin dibîne. Eleqeya jinan zêde ye. Gel bi baldarî guhdar dikin û pirsan dipirsin. Lê divê ev civîn tene bi carekê bi sînordar nemînin. Ji bo meclis û komun bêne avakirin divê civînên li tax û gundan berdewam bike û li ser perspektifê semîner, panel bên amadekirin û perwerdehî bê dayîn. Ji ber ku di civînan de welatî pir pirsan dipirsin, divê ev pirs bi hûrgulî bêne bersivandin û mejî û hiş baş bêne ronîkirin.
Di civînan de bêtir pirsên wekî “Çima dewlet gavan navêje?”, “Em çiqas dikarin baweriya xwe bi dewletê bînin?”, “Kesên vê nexşerêyê bi gel re parve bike û têxe meriyetê hene an na?” “Çima saziyên me parçe ne?” “Çima têkiliya navendê û rêxistinên bajar û navçeyan lawaz e. Çima dîsîplîna rêxistinî lawaz e?” Çima Kurd di qadên aborî, civakî, çandî û rêxistinî de xwe bi rêxistin nakin?” dipirsin.
Beşdarên civînê di nirxandinan de destnişan dikin ku ew bi Rêberê xwe û partiya xwe bawer in dixwazin di vê pêvajoyê de bêtir xwe bi rêxistin bikin û hemû rêxistinên têkoşînê di bin sîwanekê de bikin yek. Welatî tînin ziman ku di vê pêvajoyê de çiqas bi tevger bin û yekîtiya xwe xurt bikin dê ew qas zêde karibin encamê bigirin.
Welatî destnîşan dikin ku di vê pêvajoyê de ji bo çareseriyê pêdivî bi nexşerê û plansaziyekê heye. Welatî herî zêde li ser girîngî û ferzkirina avakirina “Yekîtî”, “Rêxistinî”, “daketina nava gel” û “Avakirina bingeha Neteweya Demokratîk” radiwestin. Dixwazin ku navenda partiya siyasî li ser kêmasî û nebesiyên xwe raweste û milê venêrtin, dîsîplîn û rêxistinkirinê xurt bikin. Dixwazin ku rêxistina qada siyasî di nava xwe de platorman çêke û kêmasiyên heyî di van platforman de derbas bikin û rêxistinê bêtir xurt bikin.
Her wiha ji bo fikr û felsefeya Rêberê Gelê Kurd Abdullah Ocalan baş bê famkirin, dixwazin li tax û gundan ji bo komun û meclisên ku bêne avakirin, bênavber seminer û panelan li dar bixin. Dixwazin li tax û gundan jî xebata perwerdehiyê bidin destpêkirin. Dixwazin her dem geşedanên têkildarî pêvajoyê ku nayên zanîn bi wan re bêne parvekirin. Welatî dixwazin li dijî şerê taybet, bişaftin, tiryak û rizandina civakê jî plansazî bêkirin û li dijî vê yekê xebatên rêxistinî bên pêşxistin.
Di civînan de tê dîtin ku gel bi baldarî û eleqeyek mezin pêvajoyê dişopîne û girêdayî Rêberê Gelê Kurd Abdullah Ocalan û tevgera azadiyê ye. Her wiha li li dijî dewletê jî fikar zêde ne.
