Amed – Şaredariya Bajarê Mezin a Amedê, di bin banê DÎSMEKê de dê 15 kursên pîşeyî bide destpêkirin. Serlêdana kursên dê heta 17ê Gulanê bidomin.
DÎSMEK (Kursên Perwerdehiya Hunerî û Pîşeyî ya Amedê) di serdema nû de jî deriyên xwe ji welatiyên ku dixwazin di qadên cuda de perwerdehiya pîşeyî bigirin re rê vedike. Ji bo perwerdehiyên ku dê ji aliyê rahênerên pispor ve werin dayîn, dê hejmareke sînordar a kursiyeran were qebûlkirin.
Serlêdana dawî 17ê Gulanê ye
Welatiyên ku dixwazin ji kursan sûd werbigirin, dikarin heta 17ê Gulanê serlêdanên xwe temam bikin. Agahiyên berfireh ên der barê pêvajoya serlêdanê û perwerdehiyan de, li ser navnîşana DÎSMEK.diyarbakir.bel.tr têne dîtin.
Dê di 15 beşên pîşeyî de perwerde bê dayîn
Di serdema nû de dê di beşên çêkirina lîstokên darîn, amigurumi, tembûr û perwerdehiya deng, lênihêrîna çerm, nexşandina çîniyan, hunerên destan, e-bazirganî, kuaforî, sêwirana modayê, wêne, seramîka sar, nexşandina kevir, tekstîl, kompîtur, û analîstiya daneyan de kurs bên dayîn.
Perwerdehî, dê li Qada Jiyana Hevpar a Sumerparkê û Navenda Kursê ya Parka Goletliyê werin dîtin. Bernameyên kursê (agahiyên dîrok û saetê), piştî temambûna serlêdanan dê zelal bibin.
Dê belgenameya beşdarbûnê were dayîn
Ji beşdarên ku kursan bi serkeftî biqedînin re dê belgenameya beşdarbûnê were dayîn. Serokatiya Daîreya Xizmetên Civakî, bi van kursên vekirî armanc dike ku welatî hem jêhatîbûnên pîşeyî bi dest bixin hem jî piştgirî bide beşdariya wan a îstihdamê.
