Roja yekem a 23’yemîn Mîhrîcana Çand û Xwezayê ya Mûnzûrê bi konseran bi dawî bû. Dirûşmeya “Bijî Serok Apo” li qada mîhrîcanê olan da.
23’yemîn Mîhrîcana Çand û Xwezayê ya Mûnzûrê ku bi dirûşmeya “Dersim jiyan e; dest nede xweza, îrade, ziman û baweriya min” tê lidarxistin, bi beşdariya hezaran kesî bi coş dest pê kir. Parlamentera DEM Partiyê Ayten Kordu, hevşaredarên Dersimê yên ku peywira wan hatiye desteserkirin û bi hezaran kes qada mîhrîcanê tije kirin.
Serokê Federasyona Komeleyên Elewiyên Dersimê (DEDEF) Alî Riza Bîlîr ewilî axivî û anî ziman ku ew ê bi biryardarî li dijî wêrankirina xwezayê û asîmîlasyona çandî derkevin û got ku hewl didin ku vê xakê bi siyanûrê jehrî bikin.
Di axaftinan de banga xwedîderketina li pêvajoya Aştî û Civaka Demokratîk hat kirin û bertek nîşanî qirkirina xwezayê û asîmîlasyona çandî dan.
Dirûşmeyên “Bijî Serok Apo”, “Bê Serok jiyan nabe” û “Em ê bi berxwedanê bi ser bikevin” li qada mîhrîcanê olan dan.
Parlamentera DEM Partiyê Ayten Kordu di axaftina xwe de banga aştiyê ya Abdullah Ocalan a 27ê sibatê bi bîr xist û wiha got: “Gel wê bi hev re aştî û demokrasiyê bînin vî welatî.”
Kadîr Çat dema ku derket ser dikê kelecaneke mezin dest pê kir û bi performansa Mizgîn Turan, Dîlan Top, Erdogan Emîr û Beser Şahîn berdewam kir. Roja yekem a mîhrîcanê bi gerandina govendê bi dawî bû.
