Amed – Nivîskar û Akademîsyen Nûr Mehmet Guler têkildarî dirêjkirina tezkereya ku li Tirkiyeyê hate kirin de anî ziman ku hê jî dewleta Tirk di şer de ji israra xwe nayê xwarê û wiha axivî: “Dewleta Tirk pêvajoya aştiyê ji xwe re weke taktîkek xapandinê dibîne. Di vê pêvajoyê de jî amadekariyên şer tên kirin.”
Rêberê Gelê Kurd Abdullah Ocalan di 27ê Sibata 2025an de banga “Pêvajoya Aştî û Civaka Demokratîk” kir. Piştî bangê PKKê di 1ê Adarê de agirbest îlan kir. Di 11ê Tîrmehê de 30 gerîlayên PKKê bi merasimeke dîrokî çek şewitandin. Lê dewletê li şûna gavan bavêje operasyonên leşkerî berdewam kir û tezkereya dervê sînor 3 salan dirêj kir.
Nivîskar û akademîsyen Nûr Mehmet Guler diyar kir ku dewletê sekna xwe ya li dijî Kurd û Tevgera Kurd neguheriye û got: “Tezkere taktîkekî şerê dijwar e. Sed sal in komar hatiye avakirin. Tezkere şêwazeke şer û dijminatiyê ye. Ew dijmatî jî tunekirin, qelskirin û belavkirinê bixwe re avadike. Hin guhertin û gav avêtin hene. Lê dîsa jî di rêveberiya Birêz Ocalan û Tevgera Kurd de tê kirin. Divê dewlet di vir de guhertineke bingehîn bide avakirin û li gorî gavavêtina PKKê û vekişîna gerîla xwe biguherîne. Dewleta Tirk pir bi tisr nêzîk dibe. Divê nêzîkatiya şer bê terikandin û hewldanên aştiyê li pêş bikeve.”
‘Di zimanê dewletê de guhertin tune’
Nûr Mehmet Guler li ser zimanê rayedarên dewletê jî rawestiya û got: “Di zimanê rayedarên dewletê de guhertin tune. Tevgera Kurd di nava salê de gelek gavên erênî avêtin. Banga 27ê sibatê, agirbesta PKKê, kongreya 12emîn a merasima şewitandina çekan a 11ê Tîrmehê sekn û guhertineke stratejîk e. Lê dewlet xwe naguhere. Alîgirê Serokê MHPê Fetî Yildiz, çend roj berê got, ‘Divê gotin û lîtera vê pêvajoyê yên hevpar çêbibe.’ Ev jî mumkun e. Danûstendin, têkilî û eleqeyên pêvajoyê çêdibin. Hewceye ku di pêvajoyên wisa de lîteratur û danûstendinên hevpar bên xurtkirin. Gotin û binavkirina vê pêvajoyê ji hev cuda ne. Tevgera Kurd dibêje ‘Pêvajoya Aştî û Civaka Demokratîk’. Dewlet jî dibêje ‘tunekirina tevgera terorê’ ”
‘Tevgera Kurd tevgereke azadiyê ye’
Nûr Mehmet Guler anî ziman ku dewlet berxwedana gelê Kurd ji xwe re weke xetereyê dibîne wiha pêde çû: “Tevgera Kurd tevgereke azadiyê ye. Ev rastiyek e. Di avakirina destpêka komara Tirk de Kurd jî xwedi temsîliyet bûn. Lê piştî avakirina komarê Kurd hatin înkarkirin. Serokê Meclisê Nûman Kurtulmuş, di axaftineke xwe de got, ‘Pêwîste derxistina PKKê ya ji lîsteya terorê bê nîqaşkirin.’ Em jî dibêjin ku divê teqez bê misogerkirin. Kurd PKKê çawa bi nav dikin divê dewlet jî wika bipejirînin. Biryara tezkereyê amadekariyên şer in, ji bo her sê çar perçeyên Kurdistanê ne.”
‘Amadekariyên şer dikin’
Nûr Mehmet Guler da zanîn ku êdî pergala heyî hildiweşe û wiha bi dawî kir: “Dewleta Tirk pêvajoya aştiyê ji bo xwe weke taktîka xapandinê dibîne. Di vê pêvajoyê de jî amadekariyên şer dikin. Dewlet di navberê de maye. Bixwaze jî nikare wekî berê li dijî Kurdan şer bike. Sûriye bixwe jî bi têkoşîna Kurdan hat guhertin. Hewceye ku dewlet pirsgirêkê di nava xwe de çareser bike.”
