Kêliyek berî niha bi dron û mûşekan êrişê ser taxek ya Silêmaniyê hate kirin. Hemdemê van êrişan şewateke mezin li devera Dûkan derket û welatiyên deverê banga li hewarçûyînê kirin. Li bajarokê Bazyan dronek ket nav sahayek futbolê ya Barzan û li gor agahiyan drona ketî xwarê neteqiyaye.
Îşev, êrişeke din a bi dronan li ser bajarê Silêmaniyê pêk hat û ziyana wê hîn nayê zanîn. Li gorî nûçeya Rojnewsê êrişeke bi dron û mûşekan li ser devera Taslûce ya bajarê Silêmaniyê pêk hatiye. Di encamê de şewateke mezin li deverê derket û heta niha ziyanên şewatê nehat zanîn. Di heman demê de, li bax û rezên Casene yên li sînorê Dûkanê şewateke mezin derket û welatiyan banga alîkariya lezgîn kirin.
Piştî êrîşan, Parêzgarê Silêmaniyê, Heval Ebûbekir peyamek weşand û tê de got: “Em êrişên li ser Silêmaniyê û Herêma Kurdistanê bi tundî şermezar dikin. Herêma Kurdistanê û hikûmetên herêmî ne beşek ji şerê li herêmê ne. Em ji welatiyan dixwazin ku nêzîkî cihê teqînan nebin û ji bo aliyên peywendîdar astengiyên trafîkê çênekin, da ku ew karibin karê xwe yê pîşeyî bikin.”
Piştî ku bi dronan êrişê ser bajarê Silêmaniyê hate kirin, dronek li sahaya futbolê ya bajarokê Bazyan yê Silêmaniyê kete xwarê. Hate zanîn ku drona ketî xwarê neteqiyaye.
