Di civîna gel a Şirnexê de hat diyarkirin ku divê gel ji bo avakirina civaka demokratîk li benda siyasetmedaran nemîne.
Li Şirnexê bi beşdariya Veysî Aktaş ê ku 10 salan bi Rêberê Gelê Kurd Abdullah Ocalan re li Girtîgeha Îmraliyê mabû, wasiyê Abdullah Ocalan, Mazlûm Dînç, Hevşaredara Êlihê Gulistan Sonuk a ku qeyûm tayînî şûna wê hatibû kirin û bi sedan welatî “Civîna Aştî û Civaka Demokratîk” hat lidarxistin. Di civîna li Eywana Konferansê ya Odeya Pîşesazî û Bazirganiyê ya Şirnexê de hate lidarxistin de destpêkê ji bo cangoriyên azadiyê rêz hat girtin. Piştî rêzgirtinê dirûşmeyên “Şehîd namirin”, “Bijî Serok Apo” û “Bê Serok jiyan nabe” hatin berzkirin.
‘Em ji bo aştiyek mayînde têdikoşin’
Di civînê de Hevşaredara Êlihê Gulistan Sonuk axivî û destnîşan kir ku armanca civînan fêrbûna rewşa Pêvajoya Aştî û Civaka Demokratîk a di nava civakê de ye û wiha axivî: “Em di çi merheleyê de ne, em çi dikin û em ê çi bikin, armanca van civînan ev e. Di vê pêvajoyê de armanca me ya herî girîng ew e ku em aştiyê mayînde bikin. Di dîrokê de gelê Kurd weke îro nêzî azadiya xwe ne bûye. Em van xebatan ji çar aliyan ve dimeşînin. Em dixwazin axaftinên di civînên me de tên kirin ji aliyê van hevalên li vir bigehe hemû civakê. Em van nîqaş û nirxandinan çiqas nava civakê de belav bikin destê Rêber Apo wê ewqad bi quwet bibe. Her kesa/ê ku ava vê axê vexwaribe, nanê vê axê xwaribe erka wê/î ya avakirina civaka demokratîk heye. Her wiha pêşengtiya civaka demokratîk ê jin bike û vê yekê Serokatî dibêje.”
‘Divê gotinên me û kirinên me wek hev bin’
Gulistan Sonuk di berdawana axaftina xwe de bal kişand ser avakirina civaka demokratîk û wiha got: “Gotinên Serokatî ji bo ke esas in. Ji ber ku em Birêz Abdûllah Ocalan ji bo xwe weke rêber dibînin. Dema ku em dibêjin Ocalan rêberê me ye divê kirinên me jî li gor vê gotina me be. Divê weke civak em şer û pevçûnên di navbera xwe de ji holê rakin. Her wiha divê destpêkê nakokî û newekheviya jin û mêr ji holê rabe. Xalek din a girîng jî nêzîkbûna civak û xwezayê ye. Divê civak bi xwezayê re jî têkiliyek xurt û aştiyane dane. Ev pêvajo li ser milê siyasetmedaran rêve naçe. Divê em nemînin benda siyasetmedaran ku werin pirsgirêkên me çareser bikin û civaka demokratîk ava bikin. Gel bi xwe dikare civaka demokratîk ava bike. Her hevalek dikare li kolana xwe, li taxa xwe komun û meclîsên xwe ava bikin. Dema em xurt bin ev yek ê gavê bi dewletê bide avêtin.
Piştî axaftina Gulistan Sonuk civînê bi nirxandinên Veysî Aktaş û Mazlûm Dînç ji çapemeniyê re berdewam kir.
