Li gorî daneyên ku Ajansa Nûçeyana Hawarê (ANHA) kom kirine, di 38 rojên şerê dawî yên li dijî êrîşên li ser Bakur û Rojhilatê Sûriyeyê de zêdeyî 365 êrîşkarên girêdayî MSO û komên din hatin kuştin. Li aliyê din di êrîşan de 81 sivîl hatin kuştin.
Di 27ê mijdarê de piştî HTŞê li Helebê dest danî ser gundan û Helebê, komên çekdar ên wekî MSO, Ceyş El Vatanî, Artêşa Sultan Mûrad jî dest bi êrîşan kir. Êrîşên komên çeteyan ku xwe dispêrin Tirkiyeyê li dijî Şehba, Til Rifat, Minbic, Tişrîn, Kobanê û herêmên din zêde bûn. Di 38 rojên dawî de li aliyekî dewleta tirk bi SÎHA û ÎHAyan êrîşî binesaziyan û sivîlan dikin, li aliyekî din jî komên çeteyên girêdayî Tirkiyeyê, li gelek hermêmên Bakur û Rojhilatê Sûryeyê, bi taybet li gundewarên Minbicê û derdora bendava Tişrînê, êrişên dijwar pêk tînin. Artêşa tirk û komên girêdayî wê çekên giran, balafirên şer ên bêmirov bi kar tînin. Li dijî van êrîşan Hêzên Sûriyeya Demokratîk (HSD) herêmê ji êrîşan diparêze û şerê giran heye.
Herî kêm 365 êrîşkar hatin kuştin
Li gorî amarên dawîn ên ku Ajansa Nûçeyan a Hawarê (ANHA) kom kirine, hejmara êrîşkarên ku hatine kuştin, gihaştiye 365an. Piraniya wan li rojavayê bendava Tirşrînê hatine kuştin. HSDê ragihand ku wan 3 balafirên bêmirov yên Bayraktar TB-2 li nêzî Pira Qereqozaqê û yeke bêmirov a Anka li gundewarên Til Temirê û yek jî ya Aksungur li gundewarên Dirbêsiyê xistine.
81 şervanên HSDê jiyana xwe ji dest dan
HSDê ragihand ku heta 15 Çileyê di berxwedana dîrokî ya li bendava Tişrîn û Pira Qereqozaqê de, 81 şervanên HSDê jiyana xwe ji dest dane.
Di êrîşan de 2 rojnameger û 49 sivîlan jiyana xwe ji dest dan
Êrişên Tirkiyeyê de 2 komkujiyên cuda li navçeya Eyn Îsa û bi taybet gundên El Musterîha û Sifeyan ku di 8 û 10ê kanûna sala borî de pêk hatin, 20 sivîlan jiyana xwe ji dest dan.
Kombûna Jinan a Zenûbiya ragihand ku di 8ê Kanûnê de 3 endamên wan li Minbicê bi destê komên girêdayî Tirkiyeyê şehîd bûne.
Di 11ê kanûnê de li ser Pira Qereqozaqê di encama gulebarana rasterast a çeteyan a li ser sivîlan de jineke bitemen jiyana xwe ji dest da. Di heman rojê de ambulansa Nexweşxaneya Kobanê hate bombebarankirin, di encamê de ajokar û birîndarekî di ambulansê de bû şehîd bûn.
Di encama topbarana artêşa tirk a li ser gundê Ceada de 2 zarokan jiyana xwe jidest da. Di topbaraneke din de jî ku di 12ê kanûnê pêk hat, dayikek û zarokekî jiyana xwe ji dest da.
Di 13ê kanûnê de çeteyên dewleta tirk xwediyê xwaringeha El Şehbender a Minbicê kuştin.
Nûçegihana ANHAyê Cîhan Bilgîn û rojnamevan Nazim Daştan di 19ê kanûnê de li ser rêya di navbera Sirîn û bendava Tişrînê ya li başûrê Kobanê de di êrişa balafireke bêmirov de şehîd bûn.
Di 27ê kanûnê de çeteyan êrişî Şaredariya Gel a bajarokê Tişrîn ê kantona Reqayê kirin û parêzvanê wê Mehmûd Muslim kuştin.
Di 31ê kanûnê de leşkerên artêşa Tirk ên li ser sînor gundê Qeremox ê gundewarên rojhilatê Kobanê bi guleyan hedef girtin û di encamê de ciwanê bi navê Mihemed Nasan Seîd birîndar bû.
Di 8ê çile de dema karwanê sivîlan ji bo parastinê çû bendava Tişrînê, balafira SÎHA li dijî gel komkujiyek pêk anî û di encamê de 5 sivîl şehîd bûn û 15 sivîl jî birîndar bûn.
Di êrişa balafirên şer ên artêşa Tirk a li ser maleke li gundê Mesreb ê bajarê Sirînê yê başûrê Kobanê ya di 10ê çileyê de, ji heman malbatê 4 kes hatin kuştin û 4 jî birîndar bûn.
Di 10ê çileyê de, Hêzên Ewlekariya Hundirîn ragihand ku di encama êrişa balafirên bêmirov ên dewleta Tirk a li ser bejahiya Dêrikê de 2 sivîlan jiyana xwe ji dest daye û sivîlek jî birîndar bûye.
