Di bernameya bîranîna Denîz Poyraz a li Îzmîrê hat lidarxistin de hat destnîşankirin ku rêya rawestandina êrişên li ser jin û Kurdan xwe bi rêxistinkirin û têkoşîn e û wiha hat gotin: “Em xwe birêxistin bikin, têbikoşin û aştiyê bînin ser van axan.”
Rêxistina Partiya Wekhevî û Demokrasiyê ya Gelan (DEM Parti) a Îzmîrê, di çarçoveya bernameya bîranîna Denîz Poyraz a ku di êrişa 17ê hezîrana 2021an a li ser avahiya HDPê ya Îzmîrê de hatibû kuştin, li avahiya partiyê hevpeyvînek li dar xist. Di hevpeyvîna ku aktîvîsta Tevgera Jinên Azad (TJA) Gulistan Sonuk û parêzera doza Denîz Poyraz Turkan Aslan Agaç wekî axaftvan beşdar bûn de pankarta “Me soz daye Denîz û hemû rêhevalên ku me di têkoşîna azadiyê de winda kirine; em ê jiyaneke nû ya wekhev û azad ava bikin” hat vekirin û gelek caran dirûşmeya “Şehîd namirin” hat berzkirin. Parlamenterê DEM Partiyê yê Îzmîrê Îbrahîm Akin, Dayikên Aştiyê, aktîvîstên TJAyê, rêveberên DEM Partiyê û gelek kes tevlî bernameyê bûn. Bîranîn bi deqeyek rêzgirtina ji bo kesên ku di têkoşîna azadiyê de jiyana xwe ji dest dane dest pê kir. Piştî rêzgirtinê sînevîzyonê hat pêşandan.
‘Êriş rasterast bi destê desthilatdariyê hatin meşandin’
Gulistan Sonuk axaftina xwe bi bîranîna Sema Yuce û Denîz Poyraz û di şexsê wan de bi bîranîna hemû şehîdên doza Kurd û Kurdistanê dest pê kir û soza berdewamkirina doza Kurd û Kurdistanê nû kir. Gulîstan Sonuk anî ziman ku li Kurdistanê mirov Kurd be, jineke Kurd be berpirsyariyên mirov gelekî giran in û got: “Mirov xwedî du nasnameyên ku sîstem wekî çîna duyemîn pênase dike ye. Her wiha di nav vê civaka yekperest de tu her dem wekî armanc têyî nîşandan. Li her derê dema tekoşîna azadiya jinan bidî meşandin tu bi êrişan re rû bi rû dimînî; lê dema tu Kurd bî, ji ber nasnameya te ya Kurdbûnê jî êrişî te dikin. Ev êriş rasterast bi destê desthilatdaran pêk tên; desthilatdar an bi awayekî organîze van êrişan plan dike an jî bi zimanê xwe yê qirêj rê li ber kujeran vedike.
‘Paradîgmayeke ku yê din qebûl nake, xwestin ava bikin’
Turkan Aslan Agaç bal kişand ku êrişa kuştina Denîz Poyraz di dîroka Tirkiyeyê de yekemîn êriş e ku li dijî avahiya partiyekê hatiye kirin û got: “Di nava rojê de, li ber çavê her kesî û di bin kontrola hêzên ewlehiyê de êrişên çekdarî hatin kirin. Ev yek di dîroka Tirkiyeyê de tune ye. Ev êrişên hatine kirin, encama sîstemeke sed salî ye ku ji bilî xwe, yanî ji bilî Tirk û Sûniyan, her kesî wekî ‘yê din’ dibîne. Daxwaza komîsyonên heqîqetê jî ji bo vê yekê heye. Lê belê di vê qonaxê de, em ji xala avakirina komîsyonên heqîqetê dûr in. Ez hêvî dikim ku Pêvajoya Aştî û Civaka Demokratîk bi ser bikeve. Helbet mîna xwestekekê gotina vê yekê xelet e. Ji ber ku em hemû êdî dizanin ku ev pêvajo hem muzakere ye û hem jî têkoşîn e. Muzakereyek heye, lê belê beşa wê ya herî mezin divê bi têkoşînê derbas bibe.”
‘Pêwîst e em xwe bi rêxistin bikin, têbikoşin û aştiyê bînin ser van axan’
Turkan Aslan Agac diyar kir ku bi xeteke bihêz a têkoşîn û rêxistinbûnê mirov dikare bigihîje azadiyê û got: “Ger em xwe bi rêxistin bikin tenê wê demê rûbirûbûna ji bo derxistina kujeran û hatina dadweriyeke rastî li ser van axan gengaz dibe. Em di nav lengera tundûtûjiyê ya sed salî de ne. Divê li dijî vê em xwe birêxistin bikin, têbikoşin û aştiyê bînin ser van axan. Ez li ber têkoşîna hemû rêhevalên ku di vê rêyê de ji bo azadî û demokrasiyê jiyana xwe ji dest dane, bejna xwe bi rêzdarî ditewim.”
Bernameya bîranînê piştî axaftina beşdaran bi dawî bû.
