Hevserokê DEM Partiyê yê Şemzînanê Agît Tekîn bal kişand ser angaştên hilbijartinê û gendeliya di ÎŞKURê de ku di civîneke AKPê ya Şemzînanê de hatiye ziman û diyar kir ku divê YSK hemû îtirazên ku berê hatine kirin, di ronahiya van îtiraf û daxuyaniyên nû de ji nû ve binirxîne.
Rêxistina DEM Partiyê ya navçeya Şemzînan a Colemêrgê, derbarê angaştên di civîneke AKPê ya Şemzînanê de ku ji gendeliya di ÎŞKURê de heta hilbijartinan gelek mijaran di xwe de dihewîne, daxuyaniyek da. Daxuyanî li ber avahiya DEM Partiyê ya Şemzînanê hat dayîn û tevî siyasetmedaran gelek welatî jî tev li bûn. Hevserokê DEM Partiyê yê Şemzînanê Agît Tekîn ku di daxuyaniyê de axivî, bal kişand ser hêrsa di civakê de avabû û got ku divê derbarê hemû angaştan de lêpirsîneke serbixwe were kirin.
‘Xelatkirina Partîzanî’
Agît Tekîn anî ziman ku hin axaftinên di civîneke AKPê de ku di raya giştî de deng veda û gotinên ku piştî wê di medyaya civakî de hatin parvekirin, ji aliyê prensîbên dewleta hiqûqê ve gumanên cidî çêkirine. Agît Tekîn diyar kir ku nîqaşên li ser girtina karkerên ÎŞKURê, di raya giştî de nerehetiyeke cidî û hêrseke civakî afirandiye û got: “Mekanîzmayên îstihdamê yên ku di çarçoveya polîtîkayên civakî de ji bo welatiyên herî hewcedar hatine avakirin, li gorî avahiyên siyasî an jî têkiliyên di nava partiyê de wekî amûreke ‘xelatkirina partîzanî’ têne bikaranîn. Ev yek tasfiyekirina prensîbên wekhevî û liyakatê ye. Ev rewş, tabloyeke hovane derdixe holê ku baweriya bi bêalîbûna saziyên giştî ji kokê ve dihejîne û nîşan dide ku çavkaniyên giştî ji bo siberoja komekê têne bikaranîn.”
‘Nîşaneya rizîbûneke pergalî ye’
Agît Tekîn destnîşan kir ku ji bo gelê Şemzînanê xala herî girîng ev e ku ev nîqaş bi şefafî werin ronîkirin û wiha li axaftina xwe zêde kir: “Divê raya giştî bi zelalî bizanibe ku di girtina karkerên ÎŞKUR û saziyên din de kîjan krîter hatine girtin, kîjan rêbaz hatine bikaranîn û gelo mudaxileyên siyasî yên wekî tê angaştkirin hene an na. Di encamê de, angaştên hatine ziman; ji aliyê têgihiştina rêveberiyê, bikaranîna çavkaniyên giştî û pergala liyakatê ve nîşaneya rizîbûneke pergalî ye. Di dîmena behsaxeber de, divê pirsa gelo nakokiyên di navbera rêxistinên navçe û bajar ên AKPê û rexneyên li ser Qaymeqam, ji ber bi cih neanîna daxwazên kesane ne, yan jî ji ber sepandina qanûnan e, bi aşkereyî were bersivandin.”
Bêhiqûqiya di hilbijartinan de anî ziman
Di berdewamiyê de Agît Tekîn gotina “We şaredarî bi dengên leşker û polîsên ku ji derve hatinbûn girt” ku di dîmen de jî bi eşkere tê gotin, bi bîr xist û wiha pê de çû: “Ev gotin, nîqaşên li ser pêvajoyên hilbijartinê kûrtir kiriye û nîqaşeke ‘desteserkirina vînê’ bi xwe re aniye. Ev angaşt, ji aliyê rewatiya hilbijartinan, parastina vîna dengdêran û xebata tendurist a pêvajoyên demokratîk ve pirsên jiyanî dihewîne. Ev zincîra ku li vîna gel hatiye xistin, êrîşek e li ser bingehên nîzama demokratîk e.”
Bang li YSKê kir ku angaştan lêkolîn bike
Agît Tekîn bang li Lijneya Bilind a Hilbijartinê (YSK) kir û axaftina xwe wiha bi dawî kir: “YSK divê hemû îtirazên ku berê hatine kirin, di ronahiya van îtiraf û daxuyaniyên nû de ji nû ve binirxîne. Ewlehiya hilbijartinê û parastina vîna gel, mijareke demokrasiyê ye ku di ser her cure berjewendiyên siyasî re ye. Her wiha di çarçoveya van hemû angaştan ku di raya giştî de cih girtine, destpêkirina lêpirsîna serbixwe ji aliyê dozgeriyên komarê ve, pêdiviyeke jêneveger a dewleta hiqûqê ye. Hiqûq nikare li hemberî van gumanên giran û îdiayên berbiçav bêdeng bimîne; hiqûq ne mecbûr e ku daxwazên kesên xwedî hêz, lê mecbûr e ku daxwazên gel û edaletê bi cih bîne. Têkoşîna me ya ji bo vîna gel û serweriya hiqûqê dê berdewam bike.”
