Amed – Dayikên Aştiyê yên Amedê êrişên li taxên Şêxmeqsud û Eşresfiyeyê şermezar kirin û gotin: “Serokatî azad nebe aştî pêk nayê”
Meclisa Dayikên Aştiyê yên li dijî êrişên li taxên Şêxmeqsud û Eşrefiyê yên Helebê dê biçin Enqereyê deklerasyonek eşkere kirin û êriş şermezar kirin. Piştî eşkere kirina deklerasyonê endamên Meclisa Dayikên Aştiyê têkildarî azadiya Rêberê Gelê Kurd Abdullah Ocalan û êrişên ser Helebê ji ajansa me re axivîn.
‘Keça min ji bo azadiya Serokatî xwe şewitand’
Endama Meclîsa Dayikên Aştiyê ya Amedê Nezahat Teke anî ziman ku heya ku Rêberê Gelê Kurd Abdullah Ocalan azad nebe ne Bakur, ne Başur, ne Rojava, ne jî Rojhilat azad nabe û wiha axivî: “Hewce ye ku Rêberê Gelê Kurd bigihîje azadiya xwe. Nêzikî 30 sal e Serokatî girtî ye. Heya Serokatî azad nebe tu cihekî jî azad nabe û em azadiya bêyî Serok naxwazin. Îro tiştên ku tên axaftin jî, tiştên ku tînin ziman jî hemû bi notên ku bi girava Îmraliyê hatine, desteser kirine û îro li wan nota mêze dikin û pêda diçin, bi zorî dikarin çar peyva biaxivin. Bila Rêberê Gelê Kurd azad bibe, bila xweşî û ronahî belavî hemû cîhanê bibe. Keça min ji bo Serokatî di bin tecrîdê de bû agir berda bedena xwe, xwe şewitand. Serokatî azad nebe ez azadiya xwe naxwazim. Divê teqez Serokatî azad bibe.”
‘Bila biçin cem Serok û bersivekê bînin’
Endama Meclîsa Dayikên Aştiyê ya Amedê Makbûle Ozbek Heya niha çavê me lê bû me digot yê aştî pêk were. Piştî mijara Rojavayê kete rojevê Serokatî hate bîrkirin. Kes behsa Serokatî nake, kes naçe cem, sedema wî çi ye? Daxwaziya gelê Kurd, Kurdên her derê aştî ye. Em bi hemû dixwazin aştî çê bibe, em hemû dixwazin Rêberê Gelê Kurd bigihîje azadiya xwe ya fizîkî. Serok mifta vê aştiyê ye, heya mifte nebe tu derî venabin. Bila dilê tu dayikê neêşe. Em şerê Rojavayê jî şermezar dikin. Em ji gelê Rojavayê re serkeftinê dixwazin. Berxwe didin ew yê serbikevin. Berxwedan jiyane, gava mirov berxwe nede mirov jiyan nake. Em dixwazin bila biçin bal serok û ji me re bersivekê bînin bila morala Gelê Kurd bê cîh.”
‘Bi azadiya Serokatî aştî pêk tê’
Dayika Aştiyê Şadiye Hayme diyar kir ku azadiya Rêberê Gelê Kurd Abdullah Ocalan çareseriya pirsgirêka ne û wiha got: “Serokatî her tim aştî xwestiye, xwestiya şer bi dawî bike. Gelê Kurd jî hertim aştî xwestine, dixwazin. Em wek Dayikên Aştiyê naxwazin xwîn birije. Em Dayikên aştiyê di her derê tekoşîna aştiyê dimeşînin. Em dixwazin destê xwe bidin destê hev lê dayikên leşker û polîsan dema ku zarokên wan jiyana xwe ji dest didin dibêjin “bila vatan sax be” nabêjin. Bila şer bisekine, dema zarokê wan çûn dê çi “vatan” bikin. Dema ku Serokatî gihîşte azadiya xwe ya fizîkî yê aştî dê çêbibe, çek yê bi temamî bêne danîn.”
