Amed – Platforma Jinan a Dîcle Amedê (DAKP) li avahiya SESê ya Amedê daxuyanî da. Sekretera SESê ya Amedê Îlknûr Ayik anî ziman ku ew destdirêjiya li dijî jinan qebûl nakin.
Piştî daxuyaniya Wezarêta Tendurîstiyê ya li ser jidayîkbûne, gelek saziyên jinan bertek nîşan didin. Platforma Jinan a Dîcle Amedê (DAKP) li avahiya Şaxa SESê ya Amedê daxuyanî da. Jinan li salonê pankarta “Qala ‘Em çawa biwelidin’ nekin. Qala ’em çawa dikarin bijîn’ bikin” vekirin. Sekretera Jinan a Şaxa SESê Îlknûr Ayîk daxuyanî da. Îlknûr Ayik diyar kir ku roj bi roj êrişên li ser jinan zêde dibe û got: “Politikayên dewletê ya dijminatiya jinan û binpêkrina mafên jinan her roj zêde dibe. Ji ber politikayên dewletê kujerên jinan nayên cezakirin. Desthilat bi navê “sala malbatê” dixwazê jinan di nava malê de bihêle. Jinan wekî kesên zarokan dikin pênasê dike’ ”
Îlknûr Ayik xwest dewlet dest ji dijminatiya jinan berde û got: “Di nava malbatê de jin wek hebûneke pîroz tê romanîzekirin û nasnameya jinan tê tunekirin. Bi nêzîkatiya ku nasnameya jinan bi dayik, hevjîn û malbatê dide diyarkirin, dixwaze hebûna jinan di civakê de tenê bi rola malbatê ve sînordar dike. Ji dayikbûnê re normal, anormal tune. Gotinên “ji bo çêkirina zarokên vaginal” êrîşeke li ser beden û tercîhên jinan e. Em careke din ji vê derê bang dikin; dest ji polîtîkayên xwe yên dijminatiya jinan berdin. Biryara çêkirina zarokan, hejmara zarokan di bin kontrola dewletê û civakê de tune ye. Em destdirêjiya li ser jiyana jinan qebûl nakin. Em têkoşîna azadiya jinan mezintir dikin”
