Wan – Ciwanên Wanê di çarçoveya meşa ji bo azadiya Rêberê Gelê Kurd Abdullah Ocalan ku dê li Amedê bê lidarxistin, bi rê ketin. Ciwanên ber bi Amedê ve bi rê ketin diyar kirin ku her gav, her gotin, her nefes ji bo azadiya Rêberê Gelê Kurd Abdullah Ocalan e.
Platforma Ciwanên Welatparêz, ji bo azadiya Rêberê Gelê Kurd Abdullah Ocalan, dê bi dirûşma “Bi Rêberê azadiyê ber bi jiyana azad ve” li Amedê meşê li dar bixe. Ciwanên Wanê ku dê tev li vê meşê bibin, ji Wanê bi rê ketin û berê xwe dan Bedlîsê. Ciwan, dê li Bedlîs û Mûşê jî bimeşin û dû re derbasî Amedê bibin. Beriya ku ciwan bi rê bikevin, li Parka Mûsa Anter ya navçeya Rêya Armûşê kom bûn û daxuyaniyek dan. Ciwanan di daxuyaniyê de pankarta “Şopdarên Rojê wê
bistînin tola Rojînê” vekirin û dirûşmên “Bê Serok jiyan nabe”, “Bijî Serok Apo”, “Bi can bi xwîn em bi te re ne ey Serok” û “Ciwan fedaiyên Serok Apo ne” berz kirin. Hevserok û rêveberên Partiya Wekhevî û Demokrasiyê ya Gelan (DEM Partî) û Partiya Herêmên Demokratîk (DBP) û gelek kes ji bo piştgiriyê li parkê kom bûn.
‘Ev meşa azadiyê ye’
Endamê Meclisa Ciwanan a DEM Partiyê Adem Yilmaz, metna daxuyaniyê xwend û bal kişand ser giringiya meşê. Adem Yilmaz, diyar kir ku dîrok dê îro li Amedê wijdana hevpar a gel, careke din bi berxwedanê binivîse. Adem Yilmaz, bi lêv kir ku ev meş ne tenê beşdarbûneke fîzîkî ye, ew meşeke gel a ji bo azadiyê, li dijî polîtîkayên înkar, asîmîlasyon û dîlgirtinê yên bi dehan salan e û got: “Ev meş ne dengê bêdengiyê ye, lê dengê berxwedanê ye. Ev meş îlankirina îradeyê ye ku ne tenê niha lê di heman demê de teşe dide pêşerojê jî. Îro em diqîrin. Em li sûrên Amedê bi Rêber Apo re dicivin. Ew sûrên kevnar şahidiya dîrok, berxwedan û fedakariya gel kirin. Niha, ew sûr bi banga azadiyê ya ku dilê bi milyonan mirovan dihejîne deng vedidin. Îro, sûrên Amedê ne tenê dîwarekî kevirî ne, ew sembola meşa me ya ber bi azadiyê ve ne, dilê berxwedana me ne.”
‘Tişta ku tecrîdê bişkîne hêza rêxistinkirî ye’
Di berdewamiyê de Adem Yilmaz, da zanîn ku ew dizanin azadî ne bi axaftinê, lê bi berxwedanê tê bidestxistin û wiha domand: “Ji ber vê yekê, em dibêjin; îro, her gavek a li Amedê ji bo azadiya fîzîkî ya Rêber Apo tê avêtin, agirê hesreta ku di dilê bi milyonan mirovan de dişewite, gurtir dike. Tecrîda mutleq a li ser Rêberê me yê li Îmraliyê ji 25 salan zêdetir hewldanek e ku ne tenê îradeya kesekî, lê belê îradeya tevahiya gelekî tê kelepçekirin. Tiştê ku dê van kelepçeyan bişkîne hêza rêxistinkirî ya gel, wêrekiya jinan, hêrsa ciwanan û rêhevaltiya me ya fedakar e.”
‘Heta Rêber Apo azad nebe, gel jî azad nabe’
Adem Yilmaz, diyar kir ku ev meşa ji Wanê û her goşeyek Kurdistanê heta Amedê dirêj dibe, ne tenê îdîayek fîzîkî ye; ew îdîayek dîrokî û siyasî ye jî. Adem Yilmaz, destnîşan kir ku ev îdîa ji bo misogerkirina azadiya fîzîkî ya Rêberê Gelê Kurd Abdullah Ocalan û avakirina aştiyek bi rûmet a ji bo gelê Kurd e û got: “Îro, em ne tenê daxwazên xwe tînin ziman; îro, em baweriya xwe ya mutleq a bi azadiyê, pabendbûna xwe ya bêdawî û helwesta xwe ya bêwestan ji tevahiya cîhanê re radigihînin. Em weke gelê Wanê dibêjin ku ev gel heta Rêber Apo azad nebe azad nabe. Tecrîda li ser Rêber Apo hatiye ferzkirin nemirovane ye û divê bi dawî bibe. Tekane rêya avakirina jiyaneke demokratîk, ekolojîk û azadiya jinan azadiya fîzîkî ya Rêbertî ye.”
‘Her gav û gotin ji bo azadiya Rêber Apo ye’
Adem Yilmaz, wiha dawî li axaftina xwe anî: “Ew kesên ku îro li vir in damezrînerên pêşerojê ne. Me beden, dil û pêşeroja xwe di vê têkoşînê de daye. Tu gef, zilm, binçavkirin û girtin nikare vîna vî gelî bişkînin. Em ji Wanê bi kevneşopiyeke berxwedanê ya hezar salan a di dilê xwe de bi rê ketin. Li Amedê em ê mil bi mil li gel bajarê azadî û berxwedanê bisekinin. Her gav, her gotin, her nefes ji bo azadiya Rêber Apo ye.”
Piştî daxuyaniyê, ciwan bi dirûşmeyên weke “Bijî Serok Apo”, “Bê Serok jiyan nabe” û “Ciwan fedaiyên Serok Apo ne” li otobûsan siwar bûn û bi rê ketin.
