Amed – Ciwanên ku piştî meşa bi dirûşmeya “Bi Rêberê azadiyê ber bi jiyana azad ve” lidarxistibûn hedef hatibûn nîşandan, hatin binçavkirin.
https://www.youtube.com/watch?v=2UTYu7t8j4k
Platforma Ciwanên Welatparêz ji bo azadiya Rêberê Gelê Kurd Abdullah Ocalan, bi diruşmeya “Bi Rêberê azadiyê ber bi jiyana azad ve” di 18ê Cotmehê de meşek li dar xisti bû. Dû re Berdevkê AKPê Omer Çelîk jî di nav de ji aliyê gelek kesan ve meşa ciwanan hedef hatibû nîşandan. Wezîrê Karên Hundir Alî Yerlîkaya yê duh tev li Civîna Ewlehiya Bajêr a Amedê bû jî bi gotinên xwe ciwanên tev li meşê bûbûn hedef nîşan dabûn. Li ser vê yekê polîsan îro danê sibê li Amed, Wan û Rihayê bi ser gelek malan de girtin û bi heqaretê gelek ciwanên ku endamên Meclisa Ciwanan a Partiya Wekhevî û Demokrasiyê ya Gelan (DEM Partî) in binçav kirin. Ji ber biryara bisînor a li ser dosyaya ciwanan têkildarî binçavkirina ciwanan û hejmara wan agahî nehatin bidestxistin.
‘Xwestin weneyên xwişka min ya şehîd biavêjin çopê’
Yek ji ciwanê hatiye binçavkirin jî endamê Meclisa DEM Partiyê ya Amedê Yûsûf Demîrpolat e. Polîsên ku bi ser mala Demîrpolat a li navçeya Peyasê de girtin heqaret li malbatê kirin. Tevî ku Yûsûf ne li malê jî bû polîsan li malê lêgerîn kirin û tişt ser û bin kirin. Polîsan piştî lêgerînê bavê Yûsûf, Hanîfî Demîrpolat jî binçav kirin. Her wiha polîsan xwestin wêneyên Buşra Demîrpolat (Sozdar Avesta Amed) ku jiyana xwe ji dest daye biavêjin lê malbatê bertek nîşanî vê yekê da.
Xwişka Yusuf Demîrpolat, Semîha Demîrpolat da zanîn ku polîsan danê sibehê avêtine li ser mala wan û ev agahî dan: “Me ji wan re got Yusuf ne li malê ye, lê dîsa jî ketin malê û her der lêgerîn kirin. Dema wêneyên xwişka min Şehîd Sozdar dîtin gotin tevahî wêneyan bibin û dû re gotin ’em ê biavêjin çopê’. Me li dijî vê bertek nîşan da, dû re bavê min binçav kirin. Birayê min jî li cihekî din binçav kirine, parêzer çûne rewşa wan pirsîne lê gotinê qedexe heye. Parêzeran nekariye bi wan re hevdîtinê bikin.”
