Riha – Meşvanê Amarayê Abdullah Gurkan ku ji bo rojbûna Rêberê Gelê Kurd Abdullah Ocalan hat Xelfetiyê pêyama Abdullah Ocalan nirxand û got: “Ew peyam ji bo me mîsyoneke mezin e. Em li vir sozê nû dikin. Em ê li gel Serokê xwe rêxistina xwe mezin bikin.”
Bi boneya 76an salvegera Rojbûna Rêberê Gelê Kurd Abdullah Ocalan ji bajarên Kurdistan û derveyî welat bi hezaran kes ber bi navçeya Xelfetî ya Rihayê ve bi rê ketin. Meclîsa Civanan a Partiya Wekhevî û Demokrasiyê ya Gelan (DEM Partî) di 1ê Nîsanê de li qada Şêx Saîd a Amedê dest bi Meşa Amarayê kir. Meşvanên Amarayê piştî 2 rojan gehiştin Xelfetiyê. Li Xalfetiyê partî û saziyên demokratîk bi dirûşmeya, “Bi rêbertiya azad ber bi civaka Demokratîk” mîhrîcan li dar xistin. Piştî 2 rojên mîhrîcanê bi hezaran kes ber bi gundê Amarayê yê ku Abdullah Ocalan lê ji dayik bûye ve meşiyan. Pîrozbahiya rojbûna Abdullah Ocalan jî li hewşa xaniyê wî bi dawî bû. Welatiyên ku ji bo mîhrîcanê ji bajarên Kurdistan û derveyî welat tevlî mîhrîcanê bûn anîn ziman ku wan daxwaza azadiya fizîkî ya Abdullah Ocalan kiriye.
‘Gel ji bo Serokê xwe meşiya Amarayê’
Ji Meşvanên Amarayê ciwanê bi navê Abdullah Gurkan bal kişand ser peyama Abdullah Ocalan a ji bo civanan û got: “Me li qada Şêx Saîd meşa xwe da destpêkirin. Ji ber ku ew qad ji bo Kurdan watedar e. Çawa ku dewletê li wê qadê Şêx Seîd darve kir niha bi hezaran Kurd doza azadiyê dimeşînin. Me piştre serdana pêşengên Tevgera Azadiyê kir. Ew jî pir bi watedar bû. Tevgera Azadî ne tenê ji bo Kurdan ji bo hemû gelan bûye hêvî. Em jî di rêya wan pêşengan de dimeşin. Ew rêya me ronî dikin. Wateya wê jî ew e. Meşa me li Amarayê bi dawî bû. Encamek pir baş di meşa me de derket hole. Tevlîbûn û coşeke mezin hebû. Gel ji bo Serokê xwe meşiya Amarayê. Peyama Serok Apo hat xwendin. Serokatî dibêje Sosyalîzm civak bûyîn e. Xwe rêxistin bikin. Heke hûn nekin, Sosyalîzmê fehm nekin ez ê wê mezin rexnê bikim. Ew peyam ji bo me mîsyoneke mezin e. Em soza xwe li vir nû dikin ku em ê li gel Serokê xwe rêxistina xwe mezin bikin. Em ê Sosyalîzmê bi modernîteya konfederaslîst mezintir bikin.”
‘Azadiya Abdullah Ocalan azadiya gelê Kurd e’
Welatiyê ji Dîlokê beşdarî mîhrîcanê bû Mehmet Aydin jî bi lêv kir ku ew ji bo pîrozbahiya rojbûna Abdullah Ocalan hat tevlî mîhrîcanê bû û got: “Gelê Kurd li vir pêyama pêşeroja xwe da. Daxwaza gelê me yek e. Daxwaza me azadî û aştî ye. Daxwaza me azadiya fizîkî ya birêz Abdullah Ocalan e. Banga Aştî û Civaka Demokratîk a birêz Abdullah Ocalan jî banga Kurdan e. Ew çi bibêje gelê Kurd li pêy wî ye. Azadiya birêz Abdullah Ocalan azadiya gelê Kurd e. Divê weke gelê Kurd em jî yekitiya xwe ava bikin û bi serbikevin. Azadiya fizîkî ya birêz Abdullah Ocalan şert e. Heke azadiya wî pêk neyê azadiya gelê Kurd jî pêk nayê. Azadiya wî azadiya gelê Kurd e.”
Welatî Şukru Orhan ê ji Sêrtê tev li meşê bû jî wiha axivî: “Em ji bo Serokê xwe hatin. Em ji bo aştî û azadiyê hatin. Em li vir daxwaza xwe ya aştî û azadiyê tînin ziman. Em dixwazin zarokê me bi zimanê xwe yê dayikê perwerde bibe. Ji kuştin û tunehesibandinê tiştek çareser nabe. Divê aştî pêk were. Daxwaza me ew e ku Serokê me derkeve û were cem me.”
‘Rojbûna tevahî Kurdan e’
Dayika Hediye Yildiz ku ji bo rojbûna Rêberê Gelê Kurd Abdullah Ocalan ji Mersînê tevlî mîhrîcanê bû jî diyar kir ku ew hertim di 4ê Nîsanê de dimeşe Amarayê û ev tişt anî ziman: “Em ji bo Serokê xwe hatin. Em ji bo aştiyê hatin. Edî bes bila kuştin nebe. Em hertim aştiyê dixwazin. Divê aştî pêk were û azadiya fizîkî ya Serokê me pêk were. Girtiyên siyasî jî hemû ben berdan.”
Dayika bi navê Ayşe Îlbaş ku li Dîlokê hat tev li mîhrîcanê bû jî destnîşan kir ku ew ji bo rojbûna tevahî Kurdan hatiye û got: “Gelê Kurd li vir peyama aştî û azadiyê da. Gelê Kurd li vir careke din nîşan da ku xwedî li banga birêz Abdullah Ocalan derdikeve. Daxwaza me hemûyan azadiya fizîkî ya birêz Abdullah Ocalan e.”
