Şirnex – Rayedarên dewletê û cerdevan bi hev re xwezaya Şirnex talan dikin. Cerdevan di çavdêriya rayedarên dewletê de daristanên Besta û Mêrgûmarê dibirin û xwezalê talan dikin.
Li Kurdistanê û bi taybetî jî li Şirnexê her roj xweza tê talankirin. Li çiyayên Cûdî û Heftenîn bi salan e kanên komirê tên vekirin û çiya tên hilweşandin. Bi vê yekê ve girêdayî, bi hezaran dar tên hilkirin. Di salên dawî de ji bo lêgerîne petrolê ya li Çiyayê Gabarê bi hezaran dar hatin birîn. Ji bilî talana xwezayê ya ji ber petrol û komirê bi hinceta ewlehiyê daristanên çiyayên Gabar, Cûdî, Herekol, Heftenîn û herêmên Besta û Mêrgûmarê bi destê rayedarên dewletê û cerdevanan tên birîn.
Bi taybetî birîna daran li gundên Cilbiya û Bilga yên di nava Çiyayê Cûdî fe û herêma Besta û Mêrgûmarê berdewam dike. Beriya hefteyeke weke Ajansa Welat em ketin nava Çiyayê Cûdî û dîmenên daristan birînê ku ji aliyê cerdevanên bajaroka Sêgirgê pêk tê, me weşandin.
Daristanên Herêma Besta ji aliyê cerdevanên Hosyan ve tê birîn
Li herêma Besta û Mêrgûmarê jî bênavber birîna daristanan ji aliyê cerdevanên gundê Hosyan ê girêdayî navçeya Berwarî ya Sêrtê ve didome. Ajansa Welat kete herêmê û daristan birîn, barkirina daran a kamyonan, kerwanê kamyonên darbarîkirî û têkiliya dewlet, cerdevan û hin gundiyan îfşa kir.
Hin gundiyan daristan firtone birayê endamê AKPê yê cerdevan
Li herêma Besta daristanên ku dikevin nava tixûbên gundê Xirbikê Bestê de ji aliyê hin gundiyan ve pêşkêşî cerdevanan hatine kirin û ev gundî jî pere distînin. Cerdevanên ku daristanên Herêma Besta dibirin ji gundê Hosyan ê Sêrtê ne. Serkêşê van cerdevanan jî birayê Endamê Meclîsa Bajêr ê Sêrtê Refîk Tekîn ê AKPî ye.
Daristanên 17 gundên hatine valekirin dibirin
Ji Herêma Besta ya Şirnex heya gundê Omyanis ê navçeya Berwariya Sêrtê 17 gundên salên 1990î hatine valekirin hene. Ji ber ku çûyîna van gundan heya niha qedexe bû cerdevan bi rehetî diketin daristanan û dar dibirîn. Lê niha bi destûra leşkeran jî be şêniyên van gundên vala diçin ser axa xwe û bertek nîşanî darbirînê didin. Ji ber vê yekê cerdevan bi dizî darên li daristanê dibirin.
Herêma daristan tên birîn 65 kîlometre dirêj 50 kîlometre fireh e
Dema ji aliyê Şirnex mirov dikeve nava Herêma Besta, berê mirov dikeve Çiyayê Herekolê û pişta mirov dikeve Çiyayê Çelê Nimêjê. Her wiha tenê rêyeke şose heye ku ji Çelê Nimêjê heya Çiyayê Herekol dirêjahiya wê nêzî 65 kîlometre ye. Her wiha firehiya herêmê jî zêdetirê 50 kîlometre ye û ev herêm hemû daristan e.
Bi traktoran êzingan dikişînin
Destpêka herêmê ji gundê Xirbikê Bestê destpê dike û birîna daristan jî ji vê derê destpêkiriye. Dema em ketin herêmê ewil traktorên li ber girên êzingan ketin kadraja me. Ev traktor ji ser rêya 65 kîlometre dirêj xwe berdidin nava daristanê û darên birî tînin zeviyên ku kamyon bikaribin lê cih bibin.
Bi kepçeyan rê vedikin
Di vê rêya şose de gelek rêyên ber bi nava daristanê ve hatine vekirin hene û dema em di rêde dimeşiyan bi kepçeyê rêyên nû dihatin vekirin û ev kêliyên rê vekirinê jî me li dîmenên xwe zêde kirin. Her çiqas me xwestibe bikevin nava daristanê jî ji ber ewlehiyê û hebûna çekên cerdevanan ev yek ne pêkan bû.
Zeviya komkirina darên birî li tenişta qerekola leşkeran e
Dema em nêzî sînorê Şirnex û Sêrtê ango gundê Omyanis bûn, qereqola li ser lûtkeyek jor xuya kir û di zeviyek jêrî qerekolê de girê êzînga kete ber çavên me. Ev der herêma Mêrgûmarê ye û birîna daran li vê herêmê nû nû destpêkiriye. Di zeviyê de kamyonek, traktorek û gelek kesên ji bo barkirina daran rawestiyabûn xuya kirin. Her wiha di nava van kesan de cerdevanên bi çek jî hebûn.
Dewlet û kujerên xwezayê li ba hev in
Di dawiyê rê de ango tenişta qereqola Besta de wêneyê mezin ê talankirina daristanan derket holê. 9 kamyonên êzîng barkirî û wesayîtek fermî ya Gerînendeya Karên Çandinî û Daristanan a Şirnexê.
Piştî ku daristan tên birîn, li kamyonan êzing tên barkirin îja bazara dewlet û cerdevanan destpê dike. Beriya ku kamyon ber bi Sêrtê ve biçin karmendên Gerînendeya Karên Çandinî û Daristanê ya Şirnex makbûza pere razandinê dide kujerên xwezaya Şirnex û kujerên xwezayê bi kamyonan diçin rêya xwe.
