Sibê cenazeyê Hevşaredarê Xinûsê yê berê Hasan Basri Firat ku neviyê Şêx Seîd e dê ji Dortmundê ber bi warê wî ve bê şandin. Cenaze roja Înê dê li gundê Qolhesarê yê Xinûsê were veşartin.
Hevşaredarê Xinûsê yê berê Hasan Basrî Firat ku neviyê Şêx Seîd e, roja 27ê Tîrmehê li Almanya koça dawî kiribû. Ji bo Hasan Basrî Firat dê sibê li (30yê Tîrmehê) saet di 10:30an de li bajarê Dortmundê yê Almanyayê merasîma cenaze were lidarxistin. Piştî merasîmê cenaze dê pêşî bişînin Stenbolê û ji wir jî rê bikin Xinûsê.
Hate diyarkirin ku cenaze dê di 31ê Tîrmehê de roja Înê saet di 09:00an de bigihîje Balafirgeha Erziromê û wê cenaze ji wir jî bibin gundê Qolhesarê.
Piştî ku cenaze biçe gund, dê piştî nimêja Înê li goristana gundê Qolhesarê yê Xinûsê bê veşartin.
Malbat û xizmên Firat diyar kirin ku piştî merasîma definkirinê, dê sê rojan taziye li gund bê danîn.
