Amed – Cejna Remezanê hat lê dikan vala ne. Welatî û dikandarên Amedê diyar kirin ku her sala diçe her tişt biha dibe û wiha gotin: “Her sal diçê krîza aborî zêde dibe gel jî nikare danûstandina xwe ya cejnê bike.”
Salên berê dema ku ji cejnan re çend roj diman gel sûk tijê dikir û danûstandina xwe ya cejnê dikir. Ji ber ku krîza aborî her roj diçe zêde dibe, xelk nikare mîna berê danûstandina ji bo cejnê bike. Cejna Remezanê hat lê dikan vala ne û gel nikare şekirê cejnê û pêdiviyên ji bo cejnê bikire. Welatî dikan bi dikan digerin ku ji bo tiştên erzan bibînin lê cihekî erzan nemaye, lewma nikarin li gorî pêdiviyên xwe danûstandinê bikin. Krîza aborî berîka gel vala kiriye. Dikandar û welatiyên Amedê ji ber rewşa aborî bi gilî û gazin in. Dikandar û welatî ji Ajansa Welat (AW) re axivîn û diyar kirin ku sebebê kriza aborî polîtîkayên aboriyê yên desthilatdariyê ye.
‘Cejn hat lê dikan vala ne’
Dikandarê bi navê Şener Çakircali diyar kir ku wekî berê kes nikare şekirên eydê bikire û wiha axivî: “Krîza aborî heye. Bi gel re pere tuneye û her tişt jî biha ye. Em jî wekî berê nikarin tiştan bifiroşin. Mişterî di cejnên berê de beriya cejnê bi çend rojan dihatin û danûstandina xwe dikirin û bi kîlo kîlo tişt dikirîn. Lê niha cejn hat dikan vala ne. Kirêya me bi qasî qezenca me ye, ev rewş jî bandora xwe li tiştan dike û her tişt biha dibe.”
‘Bila çavên dayikan li rê nemîne…’
Welatiya bi navê Seyran got ku divê êdî herikandina xwînê bê rawestandin û wiha axivî: “Ez çûm goristanê û min duayê xwe li cangoriyan kir. Em dixwazin êdî cejn xweş derbas bibin, çavên dayikan li rê nemîne… Cejn hat lê dilê me ne rehet e. Ez dixwazim ev cejn bibe wesîla azadiyê, xwişk û biratiyê. Bila êdî xwîna xortan nerije.”
‘Ev cejn bila bibe wesîla azadiyê’
Selîm Şahîn jî bi bîrxist ku krîza aborî bandora xwe li ser her tiştî dike û wiha got: “Êdî cejn ne wekî cejnên berê ne. Gel nikare danûstandina xwe bike. Karê me tune ye ji ber ku bi gel re pere tune ye. Berê gel bi kîlo kîlo tişt dikirîn lê niha nikare bikire. Krîza aborî çiqas zêde dibe gel jî danûstandina xwe kêm dike. Ez hêvî dikim ku ev cejn bibe wesîla azadiyê.”
‘Gel di jiyana xwe de her tişt kêm kiriye’
Dikandarê bi navê Abdullah Gunce jî diyar kir ku hewcedariya xelkê pirr e û lê xelk nikare tiştên cejnê bikire û wiha axivî: “Îsal danûstandin gelek kêm e ji ber ku her tişt gelek biha bûye. Gel bi mecbûrî tê danûstandin dike lê tiştên erzan û hindik dikire. Berê xelk dihat nêzî deh pazdeh kîlo şekirê cejnê dikirî lê niha kîloyek dikire. Jiyan gelek biha bûye û ji ber vê yekê bi gel re pere tune ye. Gel ji xwarin û vexwarina xwe her tişt kêm kiriye.”
‘Êdî rewşa gel bila baş bibe’
Welatiyê bi navê Veysî Yildiz jî bi bîrxist ku azadî hebe danûstandin jî erzan dibe û wiha got: “Her tişt biha dibe, ev tişt jî bandorê li jiyan û debara gel dike. Kîloya goşt û şekirê cejnê gelek biha ye. Ez hêvî dikim ku ev cejna îsal bibe wesîla hizûrê. Rewşa gel êdî bila baş bibe. Berê me bi 500 lîreyî gelek tişt dikirî lê niha em kîloyêk şekir dikirin.”
‘Êdî bila cejnên me xweş derbas bibin’
Welatiyê bi navê Mehmed Emîn Aykaç jî da zanîn ku tu kes gel nafikire û wiha got: “Her tişt gelek biha ye, şekirê eydê gelek biha ne. Berê me dikaribû şêranî ji xwe re bikiriya lê ev çend sal in em tenê şekir dikirin. 3 zarokên min henê, dixwazin ji xwe re cilên eydê bikirin lê her tişt gelek biha ye. Ez dixwazim êdî cejnên me xweş derbas bibin.”
