Şirnex – Rêxistinên DBP, DEM Partî û TJA li dijî êrişên li ser Bakur û Rojhilatê Suriyeyê meşiyan. Girsiyê di meşê de dirûşmeyên “Bijî berxwedana Rojava”, “Elçiyê aştiyê li Îmraliyê ye”, “Jin jiyan azadî” û “AKP dê hesab bide gel” berz kirin.
Rêxistinên DBP), DEM Partî, ên Şirnex û Navçeyên wê, Tevgera Jinên Azad (TJA), li dijî êrişên komên çekdar ên giredayî Tirkiyeyê li ser Bakur û Rojhilatê Suriyeyê li navçeya Silopiyayê çalakiya meşê li darxist. Endam û rêveberên partiyên siyasî, rêxistinên saziyên sivîl û gelek kes tevlî meşe bûn. Girse bi pankarta ku li ser, “Rojava rûmeta me ye” dinivîsîn hilgirtin û li ber dibîstana Cumhuriyetê ya navenda navçeyê heta ber deriyê avahiya DEM Partî ya navçeya Silopiyayê meşiyan. Girseyê di meşê de bê navber, “Bijî berxwedana Rojava”, “Elçiyê aştiyê li Îmraliyê ye” , “Jin jiyan azadî” û “AKP dê hesab bide gel” berzkirin û dovîzên li ser, “Bijî şoreşa Rojava ya jinan”, “Kobanê neket Minbîç jî nakeve” û “Bijî gelê Rojava” hilgirtin.
Girsê bi çepik û dirûşmeyan heta ber DEM Partiyê ya navçeyê meşiyan û daxuyanî dan. Di daxuyaniyê de hevserokê DBPê yê Şirnexê Sekvan Kiliç diyar kir ku ew li dijî êrişên li ser Bakur û Rojhilatê Suriyeyê çalakiyê lidar dixin û wiha got: “Bangawaziya me ji tevahiya cîhanê re heye. Em dixwazin ku li Suriyeyê çareseriyek çêbibe. Em qebûl nakin ku çeteyên DAIŞê careke din êrîşî Rojava bikin. Em ê ji bo Rojava piştgiriya xwe û tekoşîna xwe bidomînim. Îro hêza çareseriyê birêz Ocalan e. Derîyê zadiyê û aşitiyê Îmraliye. Em dibêjin vî deriyî vekin.”
‘Rêya çareseriyê Îmralî ye’
Piştre jî parlamenterê DEM Partî yê Bîtlîsê Huseyîn Olan axivî. Huseyîn Olan jî anî ziman ku pirsgirêk bi şer çareser nabe û xwest bi diyalogê çareser bibe. Huseyîn Olan bang li qada navneteweyî kir û got: “Hikûmeta Esad hate hilweşandin. 10 sal beriya niha ji bo rizgariya mirovahiyê jinên cîhanê, kal û pîran bedenê xwe kirin mertal. Lê îro tê xwestin ku van destkeftiyan tune bikin. Em îro bang li Tirkiyeyê dikin ku pirsgirêka Kurd bi şer çareser nabe. Bi rêya demokrasiyê çareser dibe. Rêya vê jî diyare, rêya vê Îmraliye. Di hevdîtina herî dawî de Birêz Ocalan anî ziman ku hêza wî ya teorîk û pratîk heye ku çareser bike. Em êdî naxwazin mirin çêbibe. Banga me ji dewletên navdewletî jî ew e ku li dijî vî şerî bêdeng nemînin û nehêlin ku êdî xwîn birije. Ha Qamişlo, ha Nisêbîn ji bo me ferq nake em ê tebikoşin.”
Daxuyanî bi çepik û dirûşmeyan bi dawî bû.
