PJAK ku ji Kongreya Azadiya Îranê ya li Londonê tê li darxistin, piştî bertekan careke din ji bo kongreyê hate vexwendin û tê payin ku nûnerê PJAKê di rûniştina îro de biaxive.
Partiya Jiyana Azad ya Kurdistanê (PJAK), ji Kongreya Azadiya Îranê ku di 28-29ê Adarê de li Londonê tê lidarxistin hatibû derxistin. Endamê Konseya Rêveber a PJAKê Revar Avdanan, ragihand ku piştî bertekan careke din ji bo kongreyê hatine vexwendin.
Avdanan derbarê mijarê de li ser hesabê xwe yê Xê daxuyaniyek da û got: “PJAKê, piştî bi awayekî fermî hatî vexwendin, ji destpêkê ve helwesta Kongreyê erênî pêşwazî kir. Lêbelê piştre bêyî ku daxuyaniyeke zelal were kirin, nav û pozîsyona nûnerî ji bernameyê derxist ku ev jî li dijî rêgezên demokratîk bû. Li ser vê yekê PJAKê, ji hemû derdor û hêzên alîgiriya demokrasiyê dikin pişttiriyeke mezin girt û helwestekî rexneyî raber kir.”
Rexneya bandar kir û rê li ber feraseteke nû vekir
Avdanan destnîşan kir ku piştî van rexneyan, hinek endamên Konseya Koordînasyona Kongreyê, piştî nîqaşên kûr pêvajoya guherandina vê rewşê domandin û di encamê de jî rê li ber feraseteke nû vekirin. Avdanan diyar kir ku PJAK dîsa ji bo kongreyê hate vexwendin û nûnerê sereke yê partiyê dê tevlî kongreyê bibe û axaftinekê bike.
Her wiha Avdanan anî ziman ku PJAK spasiya hemû kesayetên standartên demokratîk parastin û ji bo reformekirina vê pêvajoyê xebitîn kir û got: “PJAK, destnîşan dike ku pirsgirêkên di navbera partiyên Kurd de hewceye di çarçoveya tifaqan de û bi rêya guftûgoyê bên çareserkirin.” Avdanan, got ku dê biçin kongreyê û bi çalak tevlî bibin.”
Tê payin ku Avdanan, di rûniştina duyemîn ya kongreyê ya îro ya panela “Îraneke Ji Cihêkariyê Hatiye Paqijkirin; Tevlibûn û Hêza Hevpar” de axaftinekê bike.
