PJAKê êrîşa rejîma Îranê ya li ser Komeleya Zehmetkêşan bi tundî şermezar kir û sersaxiyê ji malbatên şehîdan û gelê Kurdistanê re xwest. PJAKê diyar kir ku ev êrîş carek din girîngiya yekîtiya neteweyî û têkoşîna hevpar a li dijî siyasetên dîktatorî û terorîstî nîşan dide.
Meclisa Partiya Jiyana Azad a Kurdistanê (PJAK) têkildarî êrîşa rejîma Îranê ya li ser Komeleya Şoreşgerî ya Zehmetkêşên Kurdistanê-Îran, daxuyaniyek belav kir. PJAKê êrîşa li ser Komeleya Zehmetkêşan bi tundî şermezar kir û sersaxiyê ji malbatên şehîdan û gelê Kurdistanê re xwest.
Daxuyaniya PJAKê wiha ye:
“Di êrîşa moşekî ya hovane ya vê sibehê ji aliyê dewleta Îranê ve li ser kampên Komeleya Şoreşgerî ya Zehmetkêşên Kurdistana Îranê li nêzî Zirgiwêze hatî pêkanîn, bû sedema şehîdbûna 9 pêşmergeyên Komeleyê. Em wek Meclîsa Partiya Jiyana Azad a Kurdistanê vê êrîşa terorîstî bi tundî şermezar dikin û sersaxiyê ji malbatên serbilind ên wan 9 şehîdan û hemû gelê Kurdistanê dixwazin.
Ev çalakiya terorîstî ku berdewamiya siyaseta qirkirina gelê Kurd e, nîşaneya tirsa kûr a rejîmê ya li hember vîna azadîxwaziyê ye. Xwîna wan 9 pêşmergeyên ku di vê êrîşa hovane de jiyana xwe feda kirin, careke din girîngiya yekîtiya neteweyî û têkoşîna hevpar a li dijî siyasetên dîktatorî û terorîstî yên rejîma Komara Îslamî nîşan dide.
Li gel hevxemiya me ya kûr ji bo vê karesatê, em radigihînin ku rêya azadiya Kurdistanê bi xwîna şehîdan geştir dibe û xebata rewa ya gelê me heta serkeftina teqez dê berdewam bike.”
