Ji bo endamên HPGê Celîle Turk û Ridvan Çelenk ku di dîrokên cuda de li herêma Zapê ya Herêma Kurdistana Federe jiyana xwe ji dest dabûn li navçeya Peyas a Amedê şîn hate danîn.
Malbatên endamên HPGê Celîle Turk (Fîlîz Dêrsim) û Ridvan Çelenk (Têkoşer Dorşîn) ku di dîrokên cuda de li herêma Zapê ya girêdayî Herêma Kurdistana Federe jiyana xwe ji dest dabûn li Mala Şînê ya Şaklatê ya li navçeya Peyas a Amedê şîn danîn. HPGê îro ragihand ku endamê wan Ridvan Çelenk di 22yê Tîrmeha 2019an de endama wan Celîle Turk jî di 18ê Tebaxa 2019an de li herêma Zapê jiyana xwe ji dest dane. Li ser vê yekê malbatên Turk û Çelenk ji bo zarokên xwe şîn danîn.
Gelek kesan di pêşengtiya Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) ya Amedê de bi girseyî serdana şîna Fîlîz Dêrsim û Têkoşer Dorşîn kirin. Hate ragihandin ku sibê jî dê bi girseyî serdana şînê bê kirin û wê şîn sê rojan bidome.
