Nûnerên partiyên siyasî û rêxistinên civakî li Silopiyayê bi girseyî çûn şîna endamê YPGê Sûkûç.
Li taxa Şehîd Harûn a navçeya Silopiya ya Şirnexê ji bo endamê YPGê Huseyîn Sûkûç (Andok Dildar) ê di 23î îlona 2014an li bajaroka Rabîayê ya Rojava jiyana xwe ji dest da şîn danîn. Parlementera DEM Partiyê Newroz Ûysal Aslan, rêveber û endamên DEM Partî û DBPê yên Şirnex, endamên MEBYA-DERa Şirnexê endamên saziyên civaka sivîl jî di navde bi sedan kes çûn şîna Huseyîn Sûkûç a li taxa Şehîd Harûnê. Girse dema derbasî hewşa malbata Sûkûç bû diruşma, ‘Şehîd namirin’ berz kir.
Di serdana şînê de destpêkê ji bo cangoriyên azadiyê deqeyek rêz hat girtin û piştre Parlementera DEM Partiyê ya Şirnex Newroz Ûysal Aslan axivî. Newroz Ûysal sersaxî ji malbata Sûkûç re xwest û ev axaftin kir; “Her şehîdê ku şîna wan tê dayîn, li me dide nîşandan ku ev bar çiqas giran e. Ev barê azadiyê li ser milê me hemûyan e. Em dizanin mîrateya wan, daxwaza wan, ew bû ku li vî welatî azad bijîn. Weke gel û rêxistin em ê ji bo hêviyên wan pêk bên têkoşîn bidin. Ev bar êdî ketiye ser milê me û em ê li gor vê yekê têbikoşîn. Ji bo vê yekê jî hewcehiya me bi tifaqê heye.”
Piştî axaftina Newroz Ûysal dua hatin xwendin û serdana şînê bi dawî bû.
