Li Heratê di 11ê Hezîranê de hin welatî li ber avahiya walîtiyê kom bûn da ku girtina jin û keçan ji aliyê Talîbanê ve protesto bikin. Li gorî çavkaniyên herêmî, xwepêşanderan dirûşmeya ‘Jin, Jiyan, Azadî’ qîr kirin.
Li Heratê ya Afganistanê ji ber zêdebûna girtina jin û keçan, hin welatiyan li ber parêzgeha Talîbanê xwepêşandanek li dar xistin û dirûşmeya ‘Jin Jiyan Azadî’ qîr kirin. Lê belê mîna gelek çalakiyên sivîl li Afganistanê, ev xwepêşandan bi destwerdana tund a hêzên Talîbanê re rû bi rû ma.
Çavkaniyên herêmî ragihandin ku xwepêşandan di derdora saet 4ê êvarê dest pê kiriye û nêzîkî 30 kes beşdar bûne. Xwepêşanderan derbarê girtina jinan de hewl dane dengê xwe bigihînin rayedaran lê hêzên Talîbanê bi gulebarankirina hewayê û afirandina atmosferek tirsê xwepêşandan belav kirine.
Ev bûyer di demekê de tê ku jinên li Afganistanê ji mafê xwe yê perwerdehiyê bêpar dimînin û polîtîkayên sînordar ên Talîbanê berfireh dibin.
Li gorî şahidên bûyerê, Talîbanê çend demjimêr berî destpêkirina xwepêşandanan hêz û alavên leşkerî li deverên cuda yên Heratê bi cih kirine. Ev tevger bi bangên ji bo xwepêşandanên li dijî girtina jinan re hevdem bû ku nîgeraniya Talîbanê li ser belavbûna xwepêşandanan nîşan dide.
Şahid diyar kirin ku hebûna çekdar a giran li bajêr atmosferek ewlehiyê ya giran afirand û xwepêşander ji destpêkê ve bi gef û zextê re rû bi rû man.
