Bi dehhezaran kes qada konserê ya Mîhrîcana Çand û Hunerê ya Tetwanê tije kirin û guhdariya Kolektîfa Rîtmên Azad û Sîpan Xelat kirin.
Mîhrîcana Çand û Hunerê ya Tetwanê ku ji aliyê Şaredariya Tetwanê ya di bin rêveberiya Partiya Wekhevî û Demokrasiyê ya Gelan (DEM Partî) de ye tê lidarxisin, di roja 11an de jî bi hemû coşa berdewam kir. Di çarçoveya bernameya îro de Kolektîfa Rîtmên Azad ku ji Êlihê hatibûn û hunermend Sîpan Xelat derketin pêşberî guhdarvanên xwe û stranên xwe gotin. Jin, zarok, pîr û ciwan bi 10 hezaran kes ji bo guhdarkirina hunermendan qada konserê tije kirin. Di konserê de wêneyê Rêberê Gelê Kurd Abdullah Ocalan bi telefonê hat vekirin û Alaya Kurdistanê hat rakirin.
Ewilî Kolektîfa Rîtmên Azad stranên xwe ji bo aştiyê û azadiyê gotin û diyar kirin ku 27ê Sibatê “Banga Aştî û Civaka Demokratîk” mizgîniyeke ji bo hemû gelan. Komê, hemû stranên xwe diyarî aştiyê û azadiyê kirin û bertekek baş ji guhdarvanan hilgirt.
Piştre hunermend Sîpan Xelat derket ser dikê. Sîpan Xelat bi stran û dengê xwe yê zelal qada konserê hejand. Hema bibêje di hemû stranan de guhdarvanan hevaltiya Xelat kir û bi hev re demeke xweş derbas kirin. Taybetî guhdarvanan strana Berîtan bi dengeke bilind gotin.
