Komîsyona Hewirdor û Bajêr a Baroya Şirnexê, li dijî birîna daran dest bi komkirina îmzeyan dike. Baroyê ji bo standa komkirina îmzeyan serî li Qeymeqamtîya Silopiyayê da.
Komîsyona Hewirdor û Bajêr a Baroya Şirnexê, li dijî birîna daran li navçeya Silopiyaya Şirnexê, dest bi komkirina îmzayan dike. Komîsyona Hewirdor û Bajêr a Baroya Şirnexê, ji bo danîna standa komkirina îmzayan serî li Qeymaqamtiya Silopiyayê da. Baro, sibe li Kolana Hunerê, Parka Ahmet Kaya û Dortyola Silopiyayê dê standa îmzayê dayne û ji welatiyan îmzeyan kom bike. Stand wê seat 09ê sibe bê danîn û heta seat yazdehê şevê wê komkirina îmzeyan bidome.
Metna komkirina îmzayan a Komîsyona Hewirdor û Bajêr a Baroya Şirnexê wiha ye: “Ez xwezayê diparêzim û xwedî li pêşeroja xwe derdikevim. “Daristanên Şirnexê her ku diçe kêm dibin. Cihên ku daristan kêm dibin jî cihên herî bi daristan û ji aliyê xwezayê ve cihên dewlemend Cûdî, Gabar, Besta, navçeyên Qileban û Elkê ne. Sedema kêmbûna daristanan, xebatên maden, bendav, birîna daran e. Birîna daran hema bejin belavî li tevahî Şirnexê bûye. Darên tên birin jî bi kamyonan dibin bajarên cuda. Ji ber birîna daran germahiya hewaya Şirnexê jî zêde bûye û baran jî kêm bûye. Her wiha bandora birîna daran û talana xwezayê li ser sewalên kovî jî dike û di van salên dawî de hejmara sewalên kovî jî kêm bûne.
Birîna daran li dijî destûra bingehîn e û mafê hemû welatiyan heye ku li dijî vê talanê derbikeve. Ez jî mafê xwe yê destûra bingehîn bi kar tînim û daxwaza sekinandina birîna daran dikim.”
