Xarpêt – Welatiyên ku navçeya Depê beşdarî pîrozbahiya Newrozê bûn diyar kir ku banga Rêberê Gelê Kurd Abdullah Ocalan agirê Newrozê bêtir geş dike û gotin: “Warê Mazlum Dogan piştgiriyê dide banga Rêber Abdullah Ocalan”
Di dîroka Newrozê de gelek cihên girîng hene yek jî wan Dep e. Dep ji ber ku bajarê Mazlum Dogan e Newroz her sal bi awayekî girseyî tê pîrozkirin. Newroza îsal bi dirûşma “Rêbertiya Azad, Civaka Demokratîk” tê pîrozkirin. Newroza Depê bi girseyî hat pîrozkirin. Welatiyên ku tev li pirozbahiya Newroza Depê bûn têkildarî Newrozê û banga Rêberê Gelê Kurd Abdullah Ocalan a “Aştî û Civaka Demokratîk” ji Ajansa Welat (AW) re axivîn.
Pêvajo yek alî nameşe
Welatî Bariş Turantepe destnîşan kir ku banga Rêberê Gelê Kurd vê bibe çareserkirina hemû pirsgirêkan got: “Banga birêz Abdullah Ocalan ji bo çareserkirina pirsgirêka Kurd gelek giring e. Em jî dixwazin ku pirsgirêka Kurd ji aliyê siyasetê ve bê çareserkirin. Em piştgiriyê didin bangê. Pêwist e ku tevahiya civak jî piştgiriyê bidin vê bangê. Bi saya têkoşînê îro Kurd têne naskirin. Birêz Abdullah Ocalan gavek girîng avêt. Lê pêvajo yek alî nameşe. Ji bo vê pêwîst e dewlet gavên qanûnî biavêje. Ji bo pêvajo bimeşe divê birêz Abdullah Ocalan azad bibe û têkiliyê xwe bi gel re pêş bixe. Newroz li dijî desthilatdaran bi berxwedanê geş bû. Bi salan e li dijî desthilatdaran serhildana gelê Kurd berdewam dike. Çawa Kawayê Hesinkar bû nîşana berxwedanê; îro jî Mazlum Dogan Kawayê hemdem e. Newroz bi banga birêz Abdullah Ocalan wê bibe Newroza aştî û azadiyê.
Abdullah Ocalan ji bo aştiyê têdikoşe
Welatî Xanim Timûçîn (65) jî diyar kir ku Kurd her tim aştiyê dixwazin û wiha got: “Em dixwazin xort neyên kuştin. Ez bi xwe Elewî me. Niha dîsa bi kuştinê têne ser me. Li tevahiya cîhanê divê şer bê rawestandin. Niha behsa aştiyê tê kirin. Lê hêj jî êrîş berdewam dike. Em vê yekê naxwazin. Birêz Abdullah Ocalan ji bo aştiyê têdikoşe. Pêwîst e azad bibe. Em hêvî dikin ku Newroza îsal bibe Newroza aştiyê.”
Newroza îsal Newroza azadiyê ye
Welatiyên bi navê Sercan Turantepe (30) jî bal kişand li ser banga Rêberê Gelê Kurd Abdullah Ocalan û wiha axivî: “Em bangê erênî dibinin. Em aştiyê dixwazin. Ji ber hebûna şer qeyrana aborî heye. Gelê me koçî Ewropa dikin. Em vî tiştî naxwazin. Divê li vir bijîn. Newroza îsal ji bo me gelek giring e. Ji ber ku ev Newroz, Newroza azadiyê ye.”
Newroz agirê serhildanê ye
Welatî Erdem Hestirek (61) jî bi bîr xist ku li gel şer pêwajo aştiyê nameşe û wiha got: “Em ji birêz Abdullah Ocalan bawer in. Gelê kurd ji bo pêvajo pêş bikeve, bar digire ser xwe. Gelê Depê jî li pişt banga Rêber Abdullah Ocalan e. Ev pêvajo ne tenê ji bo me ji bo tevahiya Rojhilata Navîn e. Birêz Abdullah Ocalan gav avêt pêwîst e niha dewlet gav biavêje. Pêwîst e dê girtî bên berdan, zimanê Kurdî bibe zimanê fermî. Di serî de birêz Abdullah Ocalan divê tevahî girtî azad bibin. Dep warê Mazluman, Xeyriyan e, ew Newroz ji bo me gelek giring e. Newroz agirê serhildanê ye.”
