Amed – Parlementera DEM Partiyê ya Mêrdînê Berîtan Guneşê destnîşan kir ku banga Rêberê Gelê Kurd Abdullah Ocalan dê li çar parçêyên Kurdistanê û Rojhilata Navîn bibe çarenûsa gelan û got: “Banga Rêzdar Abdullah Ocalan behsa civaka demokratîk û bi hev re jiyînê dike.”
Deklerasyona Newroza 2025an di pêşengtiya Kongreya Civaka Demokratîk (KCD), Partiya Herêmên Demokratîk (DBP), Tevgera Jinên Azad (TJA) û Partiya Wekhevî û Demokrasiyê ya Gelan (DEM Partî) di 11ê Adarê de li ber Sûrên Amedê yên navçeya Sûrê ya Amedê bi dirûşma ‘Rêbertiya Azad Civaka Demokratîk’ hate dayîn. Piştî deklerasyonê Newroza îsal destpêkê li navçeya Lîcê ya Amedê hate pîrozkirin. Parlementera DEM Partiyê ya Mêrdînê Berîtan Guneş têkildarî wateya Newrozê û banga Rêberê Gelê Kurd Abdullah Ocalan ji Ajansa Welat (AW) re axivî.
Agirê Newrozê dê li seranserî welat belav bibe
Bêrîtan Guneşê diyar kir ku Newroza îsal ji ber banga Rêzdar Abdullah Ocalan zêdetir dîrokî û xwedî wate ye û got: “Ev agirê Newrozê yê ku me li Lîcê vêxist dê li seranserî welat belav bibe. Newroza Lîcê û ya îsal ji bo me ji aliyê dîrokî ve gelekî watedar e. Ji ber ku îsal em Newrozê bi hêviya azadî û aştiyê pêşwazî dikin. Her wiha em dikarin bibêjin ku agirê Newrozê îsal di 27ê Sibatê de ji aliyê rêzdar Abdullah Ocalan ve ji bo gelan hat vêxistin. Ev Newroz ji bo ku hemû gel bi hev re, bi aştiyeke bi rûmet bijîn pir watedar e.”
Newroza îsal Newroza civaka demokratîk e
Berîtan Guneşê bal kişand ser girîngiya civaka demokratîk û got: “Banga Rêzdar Abdullah Ocalan a di 27ê Sibatê de bi temamî behsa civaka demokratîk dike. Behsa bi hevra jiyîn û demokrasiyê dike. Ji ber wê şiyara me ya vê Newrozê ‘Rêbertiya azad civaka demokratîk e’. Ku em nikaribin civakeke demokratîk avabikin em ê nikaribin bi awayekî azad û demokratîk jî bijîn. Newroz her tim ji bo gelê kurd bûye raperîna li dijî zilmê. Di Newrozan de gelê kurd xwe ji nû ve afirandiye.”
‘Xwedîderketina li Newrozê xwedîderketina li banga 27ê Sibatê ye’
Bêrîtan Guneşê da zanîn ku dixwazin banga Rêberê Gelê Kurd Abdullah Ocalan li çar parçêyên Kurdistanê û Rojhilata Navîn bibe çarenûsa gelan û axaftina xwe wiha bi dawî kir: “Çareserkirina pirsgirêkên Rojhilata Navîn bi çarenûsa paradîgmaya Birêz Abdullah Ocalan ve girêdayî ye. Êdî ne tenê gelê kurd, durzî û elewî jî êdî çareseriyê di vê paradîgmayê de dibînin. Vê têkoşînê, paradîgmayê em dikarin bibêjin ku Rojhilata Navîn guhertiye. Newrozê jî her tim xizmeta guhertin, veguhertin, raperîn, hilberîn û vejînê kiriye. Em jî Newroza vejînê, newroza azadî û aştiyê pîroz dikin. Xwedîderketina li Newrozê xwedîderketina li banga Birêz Abdullah Ocalan e, xwedîderketina li çanda bi hev re jiyîn, azadî û aştiyê ye. Ji bo vê ev Newroz ji bo hemû gelan dîrok e, divê em li dîrokê xwedî derkevin, li vê bangê xwedî derkevin. Em têkoşîna xwe bilindtir bikin.”
