Berdevka DEM Partiyê Ayşegul Dogan bal kişand ser qedexekirina axaftina bi kurdî ya Dayikên Aştiyê di komisyona meclise de û ev tişt got: ” Komîsyon divê di vê mijarê de berpirsiyariyê nîşan bide û zimanê kurdî wekî zimanekî fermî qebûl bike.”
Berdevka Partiya Wekhevî û Demokrasiyê ya Gelan (DEM Partî) Ayşegul Dogan piştî civîna MYKa DEM Partî derbarê geşedanên dawî û pêvajoyê li Navenda Giştî ya DEM Partî daxuyanî da û nirxandin kir.
Ayşegul Dogan bal kişand ser civînên Komîsyona Meclîse û bi lêv kir ku civînên vê hefeyê nîşan da ku welatiyên êşa vî şerî kişandinê aştiyê dixwazin.
‘Em qedexekirina bi kurdî şermezar dikin’
Ayşegul Dogan derbarê qedexekirina axaftina bi kurdî de jî wiha axivî: “Di civîna komîsyona dawî de, pirsgirêka axaftina bi kurdî rasterast derkete holê. Nezahat Teke, jineke ku keça xwe ya 19 salî di xwepêşandanekê de winda kiriye, xwest bi kurdî biaxive. Lê serokê Meclîsê Nûman Kurtulmuş hişyarî da ku divê bi Tirkî biaxive. Endamên me yên DEM Partiyê xwestin wergerê bikin, lê ev jî nehat qebûlkirin. Nezahat Teke got, ‘Em di sedsala 21’an de ne, lê ez nikarim bi kurdî xwe îfade bikim. Ev yek pir êşandim û dilşikim’. Ev rewş yek ji lingên vê pirsgirêkê ye: axaftina bi zimanê dayikê, pejirandina nasnameyê û neyê înkarkirin. Divê destura axaftina bi kurdî bihata dayîn. Em wekî DEM Partî, qedexeya axaftina bi kurdî şermezar dikin. Ev yek ne tenê pirsgirêka Nezahat Teke ye, lê pirsgirêka bi mîlyonan kesan e ku bi zimanê xwe yê dayikê nikarin xwe îfade bikin. Komîsyon divê di vê mijarê de berpirsiyariyê nîşan bide û zimanê kurdî wekî zimanekî fermî qebûl bike. Ev yek gaveke bingehîn e ji bo aştî û demokrasiyê.”
‘Divê Komîsyon bi birêz Abdullah Ocalan re hevdîtinê bike’
Di berdewama axaftina xwe de Ayşegul Dogan destnîşan kir ku divê komîsyon bi Rêberê Gelê Kurd Abdullah Ocalan re hevdîtin bike û wiha dirêjî da axaftina xwe: “Komîsyon, ji bo dawîkirina pevçûnan û çareseriyeke mayînde divê berpirsiyariyê hîs bike û bi taybetî birêz Ocalan guhdar bike. Birêz Ocalan bi banga xwe ya 27’ê Sibatê, peyama dîtbarî ya 9ê Tîrmehê û encama 11ê Tîrmehê nîşan da ku di vê pêvajoyê de roleke girîng dilîze. Divê komîsyon vê hêza rêbertiyê bihesibîne û wî guhdar bike. Ev ne tenê daxwaza me ye, lê belê berpirsiyariya hemû aliyan e. Ji bo çareseriya pirsgirêkeke sedsalî, divê em bi cesaret tevbigerin û hemû aliyan têxin nav vê pêvajoyê. Em dibêjin divê Birêz Ocalan were guhdarîkirin. Ev dikare bi rêya çûyîna komîsyonê ya Îmraliyê an jî bi rêyên din ên guncav pêk were. Girîng e ku ev yek bi awayekî zelal û eşkere were kirin. Em ê van pêşniyaran di nav komîsyonê de bi israr bixin rojevê û bi hemû aliyan re nîqaş bikin.”
‘Divê Tirkiyeyê li Sûriyeyê roleke avakar bilîze’
Ayşegul Dogan derbarê pirsa li ser rewşa Bakur û Rojhilatê Suriyeyê jî ev tişt anî ziman: “Me hefteya borî jî gotibû. Tiştê ku divê li Sûriyeyê bê kirin, ew e ku Tirkiye li Sûriyeyê roleke avaker bilîze. Ev e hêvî. Ne astengî, lê pêşdebirin. Ji ber ku ger Tirkîye modela xwe bi serkeftî bi cih bîne, ev ê bandorên herêmî jî hebin. Me ev yek berê, di dema damezrandina Herêma kurdîstanê ya Iraqê de, gelek nîqaş kiribû. Em behsa destpêka Herêma kurdîstanê ya Iraqê dikin, li wir hebûna kurdan an statûya kurdan. Ev ji bo Tirkîyeyê metirsî ye, rîsk e, an firsend e? Gelek hat nîqaşkirin. Êdî em li ser van dubareyan neçin. Diyar bû ku ev ne metirsî ye. Divê nêrîna li ser meseleya Sûriyeyê jî nêrîneke wiha stratejîk be. Dewlet jî divê bi vî rengî nêzî vê mijarê bibe. Biryara ku bê dayîn, divê biryareke stratejîk be.”
