Amed– Şanoger Ozcan Ateş anî ziman ku wan îsal bi şiyara ‘Çiraya me geş dibe’ 10emîn Festîvala Şanoyê ya Amedê li dar xistin û Festîval di atmosfereke gelek xweş de pêk hatiye û got: “Tevlêbûn jî gelekî xurt bû.”
Di navbera 25ê Nîsan û 4ê Gulanê de li Çand Amedê, bi pêşengtiya Şanoya Bajêr a Amedê û Şaredariya Bajarê Mezin a Amedê 10emîn Festîvala Şanoyê ya Amedê bi dirûşma “Çiraya me geş dibe” pêk hat. Li Ewropayê, li Rojhilat û Başûrê Kurdistanê gelek mêvan tevî şanoyê bûn.
Festîval diyarî Bavê Teyar kirin
Têkildarî şanoyê Şanoger Ozcan Ateş çavdêriyên xwe yên li ser şanoyê bi Ajansa Welat (AW) re parve kir. Şanoger Ozcan Ateş anî ziman ku wan îsal bi şiyara ‘Çiraya me geş dibe’ 10emîn Festîvala Şanoyê ya Amedê li darxistiye û got: “Festivalê 10 rojan berdewam kiriye. Me festîvala îsal diyarî Bavê Teyar kir. Ev ji bo me cihê kêfxweşî û serbilindiyê ye. Bi tevahî 10 kom tevî festîvalê bûn, lîstikên xwe peşkêş kirin. Di nav de lîstikeke Ermenkî, 4 lîstikên Tirkî hebûn, yên din jî bi zarevayên Kurdî bûn. Festîval di atmosfereke gelek xweş de pêkhat. Tevlêbûn jî gelekî xurt bû. Temaşevan di salonê de cih nebûn. Li gor salên borî tevlibûn gelekî xurt bû. Salên bere ji ber ku şaredarî di deste qeyûm de bû me nikaribû xebatên xwe baş bimeşînin. Lê îsal Şarederiya Bajarê Mezin a Amedê xwediyê festivale bû. Reqlama festivale baş hat kirin, vê jî bandora xwe li ser tevlêbûnê kir.”
‘Festîval dibin sedemê xurtkirina şanoyê’
Ozcan Ateş bi lêv kir ku ji bo pêşketina şano û sînemayê, ji bo dîtina karê hevdû festîval karekî baş e û axaftina xwe wiha bi dawî kir: “Bi saya festîvalan hunermend tên gel hev, li ser şanoyê sohbet, nîqaş û gotûbêj tên kirin. Bi saya festîvalan kêmasî û asta lîstikan derdikeve holê, tê nîqaşkirin. Dibe wesîleya hewldana xurtkirina şanoyê. Ji bo ku asta şanoyê baştir bibe dibe zemînê nîqaşan. Wek Şanoya Amedê em hewldidin lîstikên xwe bigihînin hemû deverê. Taybetî lîstikên ji bo zarokan, tişta herî girîng jî ew e. Herwiha xebatên ji bo zarokan mezintir û berfirehtir bikin.”
