Li gorî nûçeyeke rojnameya amerîkî Washington Postê, Wezareta Şer a DYAyê (Pentagon) ji bo pesnên Trump û Wezîrê Şer ê DYAyê Pete Hegseth bidin bi pere leşkerên malnişîn ên xwedî bi hezaran şopînerên medyaya sanal peywirdar kirine.
Washington Postê nûçeya xwe sparet çavkaniyên agahdar û belgeyên fermî yên Pentagonê û ragihand ku rêveberiya DYAyê ji bo propagandaya berjewendiyên rêveberiya Serok Donald Trump û Wezîrê Şer Pete Hegseth, stratejiyeke nû ya medyaya sanal dimeşîne.
Pesnên Trump didin
Di nûçeyê de hat destnîşankirin ku leşkerên malnîşîn di nav raya giştî de pesnên siyaseta Trump û Pentagonê didin. Hate diyarkirin ku di nav van navan de Albayê Hêzên Esmanî yê malnişîn Rob Maness û Albayê Hêzên Yekîneyên Bejahî Kurt Schlîchter jî hene.
Li gorî qeydên fermî yên Pentagonê, van leşkerên malnişîn ji hefteya borî ve adreseke fermî ya e-peyamê ya hikûmetê bi kar tînin û rasterast bi Buroya Cîgirê Wezîrê Şer yê Ji Karûbarên Personel û Amadekirinê re Pêwendîdar Anthony Tata ve girêdayî ne.
Wekî karmendan tên nîşan dan û mûçe digirin
Çavkaniyan da zanîn ku ev kes bin navê “fermanberê dewletê yê taybet” an jî “pisporê ast-bilind” di sîstema daneyan a dewletê de hatine tomar kirin û ji bo van erkan mûçeyên taybet distînin. Ev plana Pentagonê li DYAyê weke manîpulekirina raya giştî û belavkirina propagandaya navxweyî tê rexnekirin.
