Amed – Endama Komîteya Amadekar a Newroza Amedê Sultan Yaray da zanîn ku xebatên ji bo amadekariya Newroza dîrokî didomin û got: “Amed ji bo Newroza dîrokî amade ye.”
Newroza îsal di bin siya “Banga Aştî û Civaka Demokratîk” a Rêberê Gelê Kurd Abdullah Ocalan de bi dirûşma “Rêbertiya Azad, Civaka Demokratîk” tê lidarxistin. Pîrozbahiyên Newrozê bi coş û kelecaneke mezin berdewam dikin. Agir û pîrozbahiyên Newrozê li her deverê Kurdistanê belav bûye. Yek ji navenda van pîrozbahiyan ku çavê hemû raya giştî ya cîhanê li serê ye; Amed e. Li bendê ye ku îsal dîsa Amedê şahidi û mazûvaniya Newrozek dîrokî bike. Tê payîn ku zêdetirî milyonek kes beşdarî Newroza Amedê bibin.
Mêvan hatine vexwendin
Komîteya Amadekar a Newroza Amedê ji çar aliyên Kurdistanê û derveyî welat re vexwendnameyên Newrozê şandin e ji bo mêvanan. Her wiha li bendê ye ku gelek siyasetmedarên û rewşenbîr wek mêvan û protokol tev li pîrozbahiyê bibin. Li aliyê din hat zanîn ku nêzî 600 rojnamgerî ji bo şopandina Newroza Amedê ji bo akredîtasyonê serî li DEM Partiyê dan e.
Bi rojane amadekariyên li Qada Newrozê ya li navçeya Rezanê jî berdewam dikin. Amadekariyên li qadê ber bi dawiyê ve diçin û Amed sibê xwe ji rojek nû û dîrokî re amade dike.
‘Amed bajarê Newrozê ye’
Endama Komîteya Amadekar a Newroza Amedê û Hevseroka Rêxistina Partiya Herêmên Demokratîk (DBP) a Amedê Sultan Yaray têkildarî xebatên amadekariya Newrozê axivî û banga beşdariya pîrozbahiyê li gelê Kurdistanê kir.
Sultan Yaray bi lêv kir ku berî her tiştî ew Cejna Newrozê li hemû kesên aştîxwaz, gelên bindest pîroz dikin û got: “Em wek komîteya amadekar xebatên xwe didomînin. Me heta niha serdana bi sedan gund û taxan kiriye. Me belavok balev kirin, me li gelek deverên bajêr xemilandiye û Amedê kiriye bajarê Newrozê. Li Qada Newrozê jî amadekariyên me temam dibin. Ji bo ewlehiyê jî me bi sedan kes peywîrdar kirin e. Dê îro jî erebeyên anonsê li nav bajêr bigerin, gel vexwînin Newrozê. Li gund û taxan, li bajarên nêzî Amedê rêxistinên me dê erebeyan eyar bikin da ku welatî dikaribin bên Newrozê.”
‘Gel herî zêde meraq peyama Abdullah Ocalan dike’
Sultan Yaray da zanîn ku di xebatên Newroza îsal de gel herî zêde dipirse ka peyam an jî dîmenê Rêberê Gelê Kurd Abdullah Ocalan heye yan na û wiha berdewam kir: “Gel herî zêde meraqa peyamek ji birêz Abdullah Ocalan dike. Em Gelek kes dixwazin ku dîmenê Rêberê Gelê Kurd Abdullah Ocalan hebe, heta gelek kes dibêjin gere êdî bi awayekî fîzîkî azad bibe û tevî Newrozê bibe. Banga Rêberê Gelê Kurd Abdullah Ocalan di nav gel de kelecaneke mezin çêkiriye. Ez bawerim dê tevlibûn jî li gor wê xurt be. Em vê Newrozê li Kawayê Hemdem û birêz Abdullah Ocalan ku mîmarê aştiyê ye pîroz dikin. Em silavên xwe jê re dişînin. Ev rêya ku nîşanî me daye, rêya herî demokratîk û adilane ye. Lewma jî daxwaza me, ya gel ya herî mezin ew e ku êdî ev tecrîd rabe, birêz Abdullah Ocalan bi awayekî fîzîkî azad bibe.”
‘Werin bi hev re em agirê azadî û aştiyê geş bikin’
Sultan Yaray herî dawî bang beşdariya pîrozbahiya Newroza dîrokî li gel kir û got: “ “Banga me ji gelê me re ew e ku her kes bi ruhê neteweyî, bi cil û bergên xwe yên neteweyî qada Newrozê tijî bikin. Bi taybetî banga me ji bo jin û ciwanan e, gere ew pêşengtiyê bikin. Hemû kesên ku dibêjin êdî bes e ji bindestiyê re, li çareseriyê digerin werin bi hev re em agirê azadî û aştiyê geş bikin, dengê xwe bigihînin cîhanê.”
