Rêxistinên DEM Partî û DBPê yên Amedê û navçeyên wê ji bo beşdariya mitînga 8ê Sibatê li navenda Amedê û navçeyên wê Çinar û Erxenî bang li rêxistinên sivîl, dikandaran û welatiyan kirin.
DEM Partî û Partiya Herêmên Demokratîk (DBP) roja 8ê Sibatê li Qada Îstasyonê ya Amedê mitînga bi dirûşma “Aştiya Civakî û Azadî” mitîngekê li dar dixin. Amadekariyên mitîngê ji navenda bajêr heta gundan berdewam dike. Parlamenter, rêveber û hevşaredarên DEM Partiyê û rêveberên DBPê li navçeyên navendî û navçeyên derveyî bajêr ji bo beşdariya mitîngê xebatek bênavber didomînin.
Parlamenter, hevşaredar û rêveberan îro li navçeya Erxenî, li gundên Çinarê û li navenda Amedê ji bo beşdariya mitîngê serdana rêxistinên sivîl, gel û dikandaran kirin û wan vexwendin mitîngê. Belavokên têde banga beşdariya mitîngê dike li dikandaran û welatiyan hatin belavkirin.
Serdana rêxistinên sivîl
Parlamentera DEM Partiyê ya Amedê Adalet Kaya û şandeya pê re li navenda Amedê serdana Baroya Amedê û rêxistinên sivîl kirin. Di serdanê de nûnerên rêxistinên sivîl vexwendin mitîngê.
Her wiha Adalet Kaya, Hevserokê DBPa Amedê Şîrîn Gurbuz û Hevseroka DEM Partiya Amedê û rêveberên partiyan serdana Partiya Welatparêzên Kurdistanê (PWK) kirin û rêveberên wê vexwendin mitîngê.
Çinar
Parlamenterê DEM Partiyê yê Amedê Serhat Eren û şandeya pê re jî li gundên navçeya Çinarê serdana welatiyan kirin û wan vexwendin mitîngê.
Erxenî
Her wiha Parlamementera DEM Partiyê ya Mêrdînê û şandeya li gel wê li navenda navçeya Erxeniyê serdana dikandaran û xelkê kirin û wan vexwendin mitîngê.
‘Azadî û aştî bi qasî nan û av girîng e’
Şandeyên DEM Partiyê û DBPê di serdanên xwe de qala girîngî û wateya mitîngê kirin û destnîşan kirin ku di roja îro de aştî û azadî bi qasî nan û av ji bo gelê Kurd û gelên din ên li Tirkiyeyê girîng e.
Nûnerên rêxistinên sivîl, dikandar û welatiyan bi kêfxweşî şandeyan pêşwazî kirin û diyar kirin ku ew ê ji bo aştî û azadiyê tev li mitîngê bibin.
