Amed – Aktîvîstên TJAyê Çîmen Fîdan û Hulya Alokmen ên têkildarî meşa xwe ya di 1ê Cotmehê de dest pê dike axivîn, diyar kirin ku armanca wan a sereke azadiya Rêberê Gelê Kurd Abdullah Ocalan e û destnîşan kirin ku aştî û azadî bi rûniştin, sekinandin û libendemayînê nayê.
Tevgera Jinên Azad (TJA) dê di 1ê Cotmehê de ji Amedê ber bi Enqereyê ve bi dirûşma “Em bihêviyê ber bi azadiyê ve dimeşin” meşê li dar bixe. TJAyê têkildarî meşê duh bi tevlibûna gelek endam û rêveberên partiyên siyasî, sazî û dezgehên sivîl ên civakî li Qonaxa Cemîl Paşa ya navçeya Sûrê ya Amedê daxuyanî da û xwest ku Rêberê Gelê Kurd Abdullah Ocalan demildest azad bibe. Aktîvîstên TJAyê Çîmen Fîdan û Hulya Alokmen têkildarî meşa xwe ji ajansa me re axivîn.
‘Ji bo aştiyeke mayinde xebat tên meşandin’
Aktîvîsta TJAê Çîmen Fîdanê diyar kir ku armancê meşa wan azadiya Rêberê Gelê Kurd Abdullah Ocalan e û wiha got: “Em ê di 1ê Cotmehê de dest pê bikin heta 7ê Cotmehê dê berdewam bike. Em ê li Amedê dest pê bikin ber bi Enqereyê ve bimeşin û em ê li Enqereyê bi dawî bikin. Rêberê Gelê Kurd birêz Abdullah Ocalan di 27ê Sibatê de ji bo civakeke demokratîk, aştiyeke bi rûmet û mayînde bangawaziyek kir. Di vê navberê de xebatên cûr bi cûr hatin meşandin. Ji hêla TJAyê û tevahî rêxistinan ve hatin meşandin. Di meha Cotmehê de komploya navnetewî jî heye. Bi meşê em dixwazin ‘Mafê Hêviyê’ ji bo Rêberê Gelê Kurd Abdullah Ocalan û ji bo hemû girtiyan bê pêkanîn û di heman demê de azadiya Rêberê Gelê Kurd Abdullah Ocalan a fîzîkî bê bidestxistin.”
‘Dewletê hêj gavek neavêtiye’
Çîmen Fîdanê bal kişand li ser pêvajoya “Aştî û Civaka Demokratîk” ku Rêberê Gelê Kurd Abdullah Ocalan da destpêkirin û wiha domand: “Yê ku vê pêvajoyê bi rê ve dibe Rêberê Gelê Kurd Abdullah Ocalan e. PKKê xwe fesix kir û di heman demê de çek şewitandin. Ev gavên ber bi çav in. Lê mixabin heta niha ji aliyê dewletê ve gaveke ber bi çav nehatiye avêtin. Ji ber kesê vê pêvajoyê bi rê ve dibe birêz Ocalan e. Ji bo ku birêz Ocalan bikare bi her beşa civakê re hevdîtinê bike divê azad bibe.”
‘Ji bo jiyaneke azad divê herkes tev li pêvajoyê bibe’
Çîmen Fîdanê anî ziman ku TJA ji pêvajoyê re pêşengtiyê dike û axaftina xwe bi van gotinan bi dawî kir: “Dema ev pêvajo dest pê kir jinan, TJAyê gotin em ê pêşengtiya vê pêvajoyê bikin. Di şeran de bedelên herî mezin jin didin. Jin di vê pêvajoyê de rol û rista xwe dilîzin. Pêwîste jin, ciwan tevahiyê gel tev li vê pêvajoyê bibin. Şer û pevçûnên ku têne meşandin ji xwezayê bigire heta ciwanan, ji gel bigire heta jinan zirareke pir mezin dide. Ji bo jiyaneke wekhev divê her kes di nava vê pêvajoyê de cihê xwe bigire.”
‘Aştî bi rûniştinê nayê’
Aktîvîsta TJAyê Hulya Alokmenê jî anî ziman ku pêvajoya Aştî û Civaka Demokratîk bi awayekê dimeşe û wiha got: “Weke civak bi taybetî jî jin em qet li benda pergalê nesekînin ka dê çi bike çi gavan biavêje. Weke TJAyê em her tim di nava bezekê de ne. Meş, komcivîn, bi gel re hevdîtin pêk anîn ji wê rojê ve em weke TJA herdem di nava xebatan de ne. Wekî din pirsgirêk pirin. Mînak hêj qeyyum berdewam dikin. Aştî bi rûniştin, bi sekine, bi hêviyê nayê.”
‘Divê şert û mercên Rêberê Gelê Kurd bên guhertin’
Hulya Alokmen di berdewama axaftina xwe de ev tişt gotin: “Ji bo ev pêvajo bimeşe me heta ku aktorê vê pêvajoyê dimeşîne neazad be ev pêvajo li cîhekî dixitime. Ji bo wê jî ji bo ku ev pêvajo bimeşe herkes dizane ku divê şert û mercên birêz Abdullah Ocalan bên guhertin. Hêj jî tecrîd bi awayekî berdewam dike. Ji bo wê jî em jin azadiya xwe di azadiya birêz Ocalan de dibînin. Ji ber vê yekê em ê vê xwesteka xwe bi meşekê bînin ziman û bajarên ku em tê re derbas bibin jî em ê daxwazên xwe bînin ziman û hêza xwe nîşan bidin.”
‘Xwedî li vê meşê derkevin’
Hulya Alokmen di dawiya axaftina xwe de ev bang kir: “Em weke jinan weke TJA bang dikin. Ne tene gelê me hemû gel û baweriyên cuda divê xwedî li vê meşê derkevin. Bi hêzeke zêde piştgiriyê bidin vê meşe. Ji bo ku meşa me bigihe armanca xwe em bang li hemû gel û jinan dikin ku piştgiriya meşa me bikin.”
