Hevşaredarên Amedê û hevserokên DBPê û DEM Partiya Amedê derketin ser dikê û gel silav kirin. Piştre agirê Newroza Dîrokî bi xwendina helbestan û coşeke mezin hat pêxistin.
Newroza îsal bi şiyara “Rêbertiya Azad, Civaka Demokratîk” ji hêla DEM Partî, DBP û TJAyê ve tê lidarxistin. Ji saetên serê sibehê ve bi de hezaran kes tên qada Newrozê, her ku diçe qad tije dibe. Ji hêlekî ve bi deh hezaran welatî tên qadê û ji hêlekî ve jî bi deh hezaran welatî li qadê li ber stran, def û ziranan govendê digerînin û Newroza Azadiyê pîroz dikin. Bi deh hezaran welatî li bin siya wêneyê Rêberê Gelê Kurd Abdullah Ocalan û Şandeya Îmraliyê yê di 27ê Sibatê de li Girtîgeha Girava Îmraliyê hatiye kişandin Newroza xwe pîroz dikin.
Dilsoziya bi Abdullah Ocalan re
Her ku diçe qad tije dibe û îsal li bendê ye ku bi ser milyonek mirov re beşdarî Newrozê bibe. Bi deh hezaran bênavber dirûşmên “Bijî Serok Apo”, “Bê Serok jiyan nabe” û “PKK gel e, gel li vir e” berz dikin. Her wiha posterên Rêberê Gelê Kurd Abdullah Ocalan li qadê tên gerandin û xelk dilsoziya xwe ya bi Abdullah Ocalan re tînin ziman.
Piştî stranbêjê ribabê Hozan Fîkret û Şerîf, Hevşaredarên Amedê Serra Bucak û Dogan Hatun, hevserokên DBPa Amedê û DEM Partiya Amedê derketin ser dikê û cejna gel pîroz kirin.
Serra Bucak axivî û got: “Amed bajarê aştî, azadiyê û demokrasiyê ye. Ev newroz newroza “Banga Aştiyê û Civaka Demokratîk” e. Amed paytexta azadiyê û demokrasiyê ye. Em ê bi hev re bi ser bikevin. Newroza we pîroz be.”
Pişt re agirê Newrozê li gel xwendina helbestan hat pêxistin. Agirê Newrozê tîna xwe da qada pîrozbahiyê û welatî li dora agir govend digerînin.
