Amed – Parlamentera DEM Partiyê Adalet Kaya diyar kir ku Tirkiye ji bo tunekirina kurdan tifaqê bi çeteyên cîhadîst re dike û got: “Di çareseriyê de muxatab diyar e. Tecrîdê rakin û dest bi muzakereyên bi birêz Abdullah Ocalan re bikin.”
Rêxistina DEM Partiyê ya Amedê li dijî operasyonên binçavkirinê, girtin û tayînkirina qeyûman li pêşiya AZC Plaza ya li Semta Ofîsê ya Amedê daxuyanî da. Hevşaredarên bajarê mezin û yên navçeyan, Parlamentera DEM Partiyê Adalet Kaya, nûnerên rêxistinên civaka sivîl û gelek welatî amade bûn. Girseyê pankarta “Ji binçavkirin, girtin û qeyûman re na, ji aştiyeke birûmet re erê” hilgirtin. Polîsan bi wesayîtên zirxî rê li trafîkê girtin. Li dijî vê zextê beşdaran bi dirûşma “Li dijî faşîzmê mil bidin milê hev” bertek nîşan dan.
Dema Hevserokê Rêxistina DBPê yê Amedê Mehmet Şîrîn Gurbuz axivî, polîsan ji bo çalakvanan anonsa “Muxalefeta li dijî Qanûna Hejmar 2911 a Civîn û Xwepêşandanan” kir. Gurbuz ji bertek nîşani polîsan da.
Hevseroka DEM Partiyê ya Amedê Gulşen Ozer jî anî ziman ku aştî bi azadiya Rêberê PKK’ê Abdullah Ocalan pêkan e. Hevşaredarê Bajarê Mezin ê Amedê Dogan Hatun jî bal kişand ser geşedanên li Rojhilata Navîn û wiha got: “Ev pêvajoya dîrokî 100 sal in didome. Ji nişka ve derneket holê. Rastî êdî xwe ferz dikin û di dawiya dawî de dê ji bo gelan û bindestan aştî, xwişk-biratî û azadî were vê xakê. An dê bi hev re tune bibin an jî dê biryara jiyaneke wekhev, adilane û birûmet bidin. Daxwaza me jiyaneke adilane û birûmet e. Ne çekên we ne jî tenak û topên we dê nekarin van daxwaz û hestên me tune bikkin. Dê gelê me serî li ber we netewîne.”
Tecrîdê rakin û dest bi muzakereyê bikin
Parlamentera DEM Partiyê Adalet Kaya jî operasyonên tên domandin weke “domandina qirkirina kurdan” nirxand û wiha got: “Tekane sûcê hevalên me yên bi qirkirina siyasî hatine girtin, kurdbûna wan e. Li rexekî qala çareseriyê dikin li rexa din mafên bijartin û hilbijartinê yên gelê kurd tune dihesibînin. Em vê qebûl nakin. Em ê mafên xwe nedin qeyûmên dizek. Ji bo ev gel nekare xizmetê bigire, hevşaredar bi îdiayên derew ji peywirê tên girtin û nahêlin şaredarî bixebitin. Çareserî zelal e. îradeya gelê kurd zelal e. Em aştiyeke birûmet dixwazin. Tavilê tecrîdê rakin û dest bi muzakereyên bi birêz Abdullah Ocalan re bikin. Cînayetên jinan, ên zarokan û tayînkirina qeyûman, encama polîtîkayên şer û neçareseriyê ne. Em jî dibêjin ku çareserî û muxatab diyar e. Çareserî li Îmraliyê ye. Tavilê hevdîtinan bidin destpêkirin.”
Daxuyanî bi dirûşman bi dawî bû.
