Şirnex – Aktivîsta TJAyê Adalet Fîdan ku di nava şandeya Başurê Kurdistanê de cih digirt diyar kir ku encamên baş ji hevdîtinan derket û dê di demên pêş de jî şande li Hewlêr, Duhok û bajarên Başurê Kurdistanê hevdîtinan bidomînin.
Şandeya ku ji Kongreya Civaka Demokratîk (KCD), Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) pêk dihat di 26ê Adarê de serdana Başurê Kurdistanê kir û li wir bi sazî û dezgeyan re hevdîtin kirin. Şandeyê li bajarê Silemaniyê li ser banga “Aştî û Civaka Demokratîk” a Rêberê Gelê Kurd Abdullah Ocalan bi sazî, rêxistin, rewşenbîr, nivîskar û gelek kesan re hevdîtin kir. Şandeyê li ser pêvajoyê pirs bersivandin û pêşniyarên wan girtin. Aktivîsta TJAyê Adalet Fîdan û endama şandeyê tekildarî hevdîtinê ji Ajansa Welat (AW) re axivî.
Adalet Fîdan diyar kir ku li ser daxwaza sazî û rêxistinên Başurê Kurdistanê wan serdan kir û got: “Di 27ê Sibatê de Rêberê Gelê Kurd Rêzdar Abdullah Ocalan banga “Aştî û Civaka Demokratîk” kir. Beriya bangê jî şandeyeke me çûbû Başurê Kurdistanê û li wir hinek hevdîtin kiribûn. Lê wê demê serdana hên saziyan nehatibû kirin. Daxwaza sazî û dezgeyên Başurê Kurdistanê hebû ku şandeyek biçe li wir hevdîtin bike. Ji ber wê weke şandeya 2emîn em çûn Başurê Kurdistanê û li wir bi sazî, partî, rewşenbîr, nivîskar û saziyên cûda re me hevdîtin kirin. Me li Silemaniyê bi hemû saziyên ku daxwaza hevdîtinê kiribûn ud hevdîtin kir.”
‘Piştgî dan banga Abdullah Ocalan’
Adalet Fîdan anî ziman ku şandeya wan li Silemaniyê eleqayeke mezin dît û wiha axivî: “Eleqeyeke pir mezin hebû. Bi kêfxweşî em pêşvazî kirin. Li ser pêvajoyê pirs pirsîn û pêşniyarên xwe anîn ziman. Piştgirî dan banga birêz Abdullah Ocalan. Anîn ziman ku bang ne tenê ji bo Bakurê Kurdistanê ji bo tevahî Kurdistanê û Rojhilata Navîn e. Anîn ziman ku ev bang dê serkeftineke mezin û aştiyeke mayinde bîne û gotin ‘Pirsgirêka Kurd bi rêya demokrasiyê divê bê çareserkirin. Ji bo wê jî alaqayeke mezin dan me. Gotin ‘Li Bakurê Kurdistanê zêdetir feydaya bangê ji bo Başurê Kurdistanê ye. Ji aliyê dewletê ve çi gav hatinê avetin? Wê gav bên avetin an na? û pêşniyarên xwe anîn ziman.”
‘Divê êrişên Tirkiyeyê rawestin’
Di berdewama axaftina xwe de Adalet Fîdan destnîşan kir ku ji ber êrişên Tirkiyeyê li ser Herêmên Parastina Medyayê fikarên saziyên Başurê Kurdistanê hene û wiha dirêjî da axaftinê: “Der barê êrişên Tirkiyeyê yên li dijî Herêmên Parastina Medyayê ya Başurê Kurdistanê de jî gumanên xwe anîn ziman. Ji raya giştî re jî hat parvekirin. Zêdetirî hezar carar herêmm bombe kirin. Her wiha li Rojavayê Kurdistanê jî êriş berdewam dikin. Wan jî anî ziman ku ew êriş zerarê dide pêvajoyê û divê êriş bên sekinandin. Dema êriş neyê sekinandin agirbest û pêvajo dikeve xetereyê. Birêz Abdullah Ocalan jî diyar kiribû ku şert û merc bên avakirin. Ji bo şert û merc bên avakirin jî divê azadiya fizikî ya birêz Abdullah Ocalan pêk bê û êriş rawestin. Sazî û dezgehên ku em bi wan re axivîn jî ew tişt anîn ziman.”
‘Pirsgirêka Kurd yek e’
Adalet Fîdan anî ziman ku hevdîtina wan a Başurê Kurdistanê ji bo yekitiya Kurd jî encamên baş derxistinê holê û got: “Em 3 rojan li Başurê Kurdistanê man. Hevdîtin pêk anîn. Bi 10an sazî û dezgehan re me hevdîtin pêk anî. Pirs nîşanê li ser pêvajoyê jî zelal bûn. Şande yek bi yek pirsên wan bersivandin. Sazî û derdorên me bi wan re hevdîtin kir. Ji bo pêvajo biçe serî piştgiriya xwe anîn ziman. Her wiha pêşniyar kirin. Ji bo pêvajo biçe serî dewlet jî gavên şenber baveje beşniyarên xurt anîn ziman. Ew hevdîtin ji bo yekitiya gelê Kurd û jinên Kurd jî encamên baş derxist hole. Sazî û derdoran jî destnîşan kir ku pirsgirêka Kurd yek e û divê yek bê destgirtin. Ji bo pirsgirêka Kurd bê çareserkirin divê hemû Kurd piştgiriya pêvajoyê bikin. Li ser vê yekê jî nirxandin hatin kirin.”
‘Hevdîtin dê bidomin’
Di dawiya axaftina xwe de Adalet Fîdan da zanîn ku serdanên wan ên Başurê Kurdistanê dê bidomin û wiha qedand: “Hevdîtinên me li Başurê Kurdistanê wê berdewam bikin. Me li Silemaniyê hevdîtin kirin Lê plan heye ku li Hewlêr, Duhok û bajarên din jî hevdîtin bên kirin. Ji bo wê jî serdana şandeyên me li Başurê Kurdistanê wê bidome û civîn û hevdîtin dê pêk bên. Yekitiya gelê Kurd û jinên Kurd ji bo me her tim pir girîng e. Ji bo yekitiya gelê Kurd jî xebatên cuda hene. Divê dewlet jî gavên şenber baveje û azadiya fizîkî ya birêz Abdullah Ocalan pêk bê. Divê jin, civan, gelê Kurd û kesên demokrat têkoşîna xwe xurtir bikin.”
