Amed – Hevserokê MEBYA-DERê M. Emin Kiliç banga Rêberê PKKê Abdullah Ocalan nirxand û got: “Her çiqas di siyasetê de niha xitimandinek hebe jî Birêz Abdullah Ocalan bi vê banga xwe bendên pêşiya siyasetê hemû rûxandin.”
Rêberê Gelê Kurd Abdullah Ocalan di 27ê sibatê de bi rêya şandeya DEM Partiyê bangewaziyeke dîrokî bi raya gişti ya cihanê re parve kir. Ev bang û peyama Rêberê Gelê Kurd Abdullah Ocalan dema bi raya giştî re hat parvekirin, bi sed hezaran welatî daketin qadan û li peyama Rêber Abdullah Ocalan guhdar kirin. Peyamên piştevaniyê yên ji bo peyama Abdullah Ocalan dewam dikin. Li ser banga Rêberê Gelê Kurd Abdullah Ocalan Hevserokê Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) ya Amedê Mehmet Emîn Kiliç ji Ajansa Welat (AW) re axivî.
PKK ji ber tundiya dewletê derket holê
Mehmet Emin Kiliç anî ziman ku dewletê hebûna gelê kurd qebûl nedikir û dixwest gelê kurd tunebike û got: “Birêz Abdullah Ocalan jî di peyama xwe de anîbû ziman. Partiya Karkerên Kurdistanê (PKK) di encama polîtikayên înkar, îmha û bişaftina gele kurd de, di encama tundiya li ser gelê kurd de derket holê. Dewletê derfeta xwe îfadekirinê, siyasetê nedida gelê kurd. Ji ber vê jî PKKê neçarî serî li şidetê da. Vê şidetê heta astekî zemina siyaset û xwe îfadekirinê vekir. Niha mirov dikare bibêje ku zemînê ku pirsgirêka kurd bi rêyên demokratik bê çareserkirin heye.”
‘Abdullah Ocalan erka xwe pêkanî dor a dewletê ye’
Mehmet Emîn Kiliç di berdewama axaftina xwe de bilêv kir ku hişmendiya Dewleta Tirk a antî demokratîk di pêşiya siyaseta demokratîk de asteng e û wiha got: “Her çiqas di siyasetê de niha xitimandinek hebe jî Birêz Ocalan bi vê banga xwe ew benda pêşiya siyasetê hemû rûxandin. Ev bangeke dîrokî ye. Li vî welatî û Rojhilata Navîn ev bang dê bibe pêvajoyeke nû, gaveke nû ji çareserkirina pirsgirêka kurd û gelek pirsgirêkên Rojhilata Navîn. Heke gel, partiyên siyasî, rêveber bi rola xwe rabin, bi awayekî demokratik ev pirsgirêk dikarin bên çareserkirin. Birêz Abdullah Ocalan bi vê banga xwe erka xwe pêk anî, êdî gog li saha dewlet û meclisê ye. Gere dewlet êdî gavên ku vê xitimandina di siyasetê de tê jiyîn ji holê rakin bavêje. Dewletê bi hişmendiya xwe, bi polîtîkayên xwe siyaseta demokratik asteng kiriye. Birêz Abdullah Ocalan bi vê banga xwe ji xwe ev xitimandin ji holê rakir, lê divê dewlet jî vêya bipejirîne. Hemû partiyên siyasî, meclis deste xwe bixin bin kevir, vê zemînê xurt bikin, bar bidin ser xwe. Carek din em nebin şahide tundiyê. Heke aliyek serî li şidetê bide aliye din jî neçar e bi şidetê bersiv bide, ev qanûneke xwazayî ye.”
‘PKKê her tim xwest pirsgirêk bi rêyên diyalogê çareser bike’
Mehmet Emîn Kiliç bal kişand ser daxuyaniya PKKê û wiha axaftina xwe bi dawî kir: “ Daxuyaniya PKKê dilsoziya PKKê ya bi Birêz Abdullah Ocalan re nişan dide. Dema mirov li dîroka PKKê dinêre mirov dibine ku gelek caran agirbest ragihandiye, her tim xwestiye pirsgirêk bi rêyên diyalog û muzakereyan bê çareserkirin. Ev daxuyaniya wan jî dilsozî û girêdana wan bi Rêber Abdullah Ocalan re nişan dide. Ev jî gaveke erênî û baş e. Tişta em dibînin niha qismekî gel hinekî di fikar û gumanan de ye. Divê tu kes nebêje êdî pêvajoya şer qediya. Her tişt çareser bû. Tiştekî wisa tuneye. Tenê şeklê têkoşînê tê guhertin. Di vir de barê gel, siyasetmedaran girantir dibe. Erk û berpirsyariya gel xurtir dibe. Divê herkes bi aqlekî selîm, di pencereyeke berfireh de li vê pêvajoyê binere û hewl bide baştir fêhm bike û berpirsyariyên xwe bi cih bîne.”
