Hevpeymana Hêzên Siyasî yên Rojhilatê Kurdistanê ya Îranê bersiv dan êriş û gefên kurê şahê yê Îranê Reza Pehlewî. Di bersivê de hat diyarkirin ku peymana wan dê hemû mafên neteweya kurd, têkoşer û azadîxwazên Îranê biparêze.
Di 22yê Sibatê de 5 partiyên siyasî yên Kurd li Rojhilatê Kurdistanê ên ji Partiya Jiyana Azad ya Kurdistanê (PJAK), Partiya Azadî ya Kurdistanê (PAK), Partiya Demokratîk ya Kurdistanê-Îranê, Sazmanî Xebatê ya Kurdistan yê-Îranê û Komeleya Zehmetkêşan ya Kurdistanê pêk tê yekgirtineke siyasî û bernameyeke hevpar ya karê siberojê ya ji bo Îranê ava kirin.
Hevpeymaniya Hêzên Siyasî ya Kurdistanê ya Îranê, di derbarê daxuyaniya dijber a kurê şahê berê yê Îranê Şah Îsmaîl Reza Pehlawî duh daxuyaniyek parve kir.
Hevpeymaniyê di daxuyaniya xwe de diyar kir ku “Piştî ragihandina ‘Hevpeymana Hêzên Siyasî yên Kurdistana Îranê’, pêleke şahî, coş û xuruşê ya şoreşgerî di nava gelê Kurd, neteweyên bindest û azadîxwazên Îranê de bilind bû û wiha got: “Rejîma Îranê û komek dijberên mafên neteweyên bindest û azadîxwaz ku xwe di bin kirasê muxalefetê de vedişêrin bertek û nefrete nîşan dan.”
‘Rastiya dîrokî ji bîr kiriye’
Hevpeymaniya Rojhilatê Kurdistanê di berdewamê de got ku duh Reza Pehlewî, bi weşandina daxuyaniya li ser medya dijîtal Xê zimaneke êrişkar û tohmetên bê bingeh li neteweya mezin ya Kurd û partiyên siyasî yên têkoşer ên Kurdistanê kir û wiha pê de çû: “Dê piştî hilweşandina rejîma Îranê artêş têkoşîna azadîxwaz ya gelê kurd û Kurdistanê bitepisîne. Reza Pehlewî rastiya dîrokî ji bîr kiriye ku bav û bapîrê wî çawa Ararata Biçûk, Behreyn û çavkaniyên çemê Hirmend de dudilî nekirin û firotin. Bi rastî, tenê cihê bav û bapîrê wî xwe nîşan daye qada komkujiya welatiyên sivîl û tepeserkirina azadiya demokrasîxwazên gelê Îranê bûye.”
‘Kevneperest her têk çûne’
Di daxuyaniyê de hat gotin ku Reza Pehlewî rastiya dîrokî ji bîr kiriye û ev tişt gotin: “Her gava ku îradeyek rastîn ji bo parçekirina Îranê hebû, kesî destûr ji bav û bapîrê wî yê tacgirtî negirt û toza wan neşikand. Çawa ku wan di bexşîna Ararata Biçûk, Behreyn û çavkaniyên çemê Hirmend de dudilî nekirin, di firotin yan jî radestkirina beşên cuda yên xaka Îranê de jî dudilî nekirine. Bi rastî, tenê cihê ku karîne xwe lê nîşan bidin, qada komkujiya welatiyên sivîl û tepeserkirina azadiya demokrasîxwazên gelê Îranê, bi taybetî jî neteweyên bindest ên vî welatî bûye.”
‘Ferqa Pehlewî û rejîmên zordar nîn e’
Hevpeymanê da zanîn ku gefên berdewam dikin li dijî daxwazên siyasî yên neteweyan, bikaranîna artêşê ye û wiha pê de çû: “Ti ferqek bingehîn di navbera rejîma wî ya siyasî ya îdeal û rejîmên zordar ên Îranê yên berê û niha de tune ye. Li gel vê, çima ew difikirin ku xelkê ji aliyê dîktatoriya Komara Îslamî ve zilm lê hatî kirin, dê amade bin ku wekî beşek ji alternatîfek ji bo Îrana pêşerojê, li ber wî û kesên hemfikirên wî serî bitewînin. Diyar e agahiya wî ji dîrok û ernîgariyê nîne, têgihiştinek rast a roja îroyî jî tuneye. Ew di sedsala borî de qet ji Kurdistanê dûr nebûye. Ti mekanîzmayeke zilm û zordariyê nîne ku li Kurdistanê nehatibe ceribandin û têk neçûbe.”
‘Roja înkarê ya Pehlewî nayê bîrkirin’
Hevpeymanê bel kişand ser helwesta Pehlevî ya li dijî daxwazên gelan û wiha got: “Pehlewî rolek ku nayê înkarkirin di dabeşbûna tevgera Jîna (Jin, Jiyan, Azadî) de lîstiye. Herwiha her kes dizane Pehlewî bi alîkariya komên gumanbar ên li dora xwe, roleke nayê înkarkirin di afirandina dubendiya di navbera gel û dijberên rejîmê de lîstiye. Dost û dijmin dizanin ku neteweya Kurd û partiyên siyasî yên têkoşer, di tevahiya jiyana zordar a komara Îslamî de, hertim dijî zilma Xumeynî bûn û her tim piştevaniya rast ya azadîxwazên neteweyên Îranê bûn.”
‘Dê peymanên dijminane negihin encamê’
Hevpeymana Hêzên Siyasî yên Kurdistanî ya li Îranê, tevî şermezarkirina daxuyaniyên wiha yên Reza Pehlewî, li ser helwesta xwe ya bingehîn bi israr e û derbarê mijarê de ev tişt gotin: “Dê ev peyamên dijminane dawî negihin tu armancekê. Berovajî vê, wê îradeya neteweyên azadîxwaz û têkoşerên Îranê ya ji bo bidestxistina armancên azadîxwaz ên gel xurtir bike. Lewma em carek din bang li hemû hêzên Kurdî yên ku azadiyê dixwazin, maf û neteweya xwe diparêzin dikin ku tevlî Hevpeymana Hêzên Siyasî yên Kurdistanî ya li Îranê bibin.”
