Rojnamevan Cengîz Altûn ê 34 sal berê hatibû kuştin li Êlihê ji aliyê gelek rojnavenan ve li ser gora xwe hat bibîranîn û gotin: “Em ê têkoşîna wî berdewam bikin û ew ê neyê jibîrkirin.”
Rojnamevan Cengiz Altûn ê ku di 24ê sibata 1992an de li Êlihê di êrîşeke çekdarî de hatibû qetilkirin, li ser gora xwe ya li taxa Çamlıcayê hate bîranîn. Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirine (MEBYA-DER), Komeleya Rojnamevanan a Dîcle Firatê (DFG), nûnerên partiyên siyasî û rêxistinên civaka sivîl û malbata Cengîz Altûn beşdarî bîranînê bûn.
Endamê MEBYA-DERê Şafî Aratemûr di bîranînê de axivî û diyar kir ku Cengîz Altûn rojnamevanek bû û got: “Wî li ser muameleya xerab a li Kurdistanê dît û nivîsand. Dewletê rojnamevanên ku dibûn dengê gel dikirin hedef û dikuştin. Wan ev yek bi alîkariya çete û rêxistinên mîna Hizbullahê dikir. Ji ber vê yekê, em ê tu carî hevalê xwe Cengîz Altûn ji bîr nekin.”
‘Em ê şehîdên xwe bi rêzdarî bi bîr bînin’
Birayê Cengîz Altûn Azad Altun jî anî ziman ku her kes li vê herêmê bi awayek giran li ber xwe dida û got: “Lê ew rojnamevan û pêşengên berxwedana îro bûn. Wan bi canê xwe bedel dan. Lê bi hişmendiya ku wan eşkere kir, wan barekî giran jî li ser me hiştin. Bê guman rewşenbîr û rojnamevanên Kurd demên xirab derbas kirin e û her tim wisa bûye. Kurd bi kuştinê nayên qedandin. Cengîz hate kuştin, lê bi hezaran kesên weke wî têkoşîn domandin. Bi gihandina hewldanên wan ji bo qonaxek pêşkeftîtir, em ê şehîdên xwe bi rêzdarî bibîr bînin.”
‘Hê jî kujer nehatine darizandin’
Rojnamevan Bîlal Gundem jî mafê axaftinê girt û diyar kir ku sûcdarên rojnamevanên hatine kuştine ji hêla dewletê ve têne zanîn û got: “Heta niha hê jî kujer nehatine darizandin û naxwazin sûcdarên kuştinên Çapemeniya Azad werin aşkerekirin.”
‘Wan mîrateyek rojnamevaniya bi rûmet li pey xwe hiştin’
Herî dawî Hevseroka DFGê Kesîra Onel jî axivî û got: “Hevalê me Cengîz 34 sal berê ji hêla Hîzbulkontrayê ve hate qetilkirin. Hevalên me yên ku di lêgerîna rastiyê de bedel dan, rêya me ronî kirin. Wan mîrateyek rojnamegeriya bi rûmet li pey xwe hiştin. Em ê bi vê hişmendiyê rojnamegeriya xwe bidomînin.”
Piştre girseyê 34 qurnefîl li ser gora Cengîz Altûn danîn.
