Komeleya Lêkolînên Çand û Ziman a Avestayê li Îzmîrê bi boneya 21ê Sibatê çalakiyek li dar xist. Di çalakiyê de hate diyarkirin ku zimanê Kurdî rûmet û nasnameya gel e û divê Kurdî ji pêşdibistanê heta zanîngehê bibe zimanê perwerdehiyê.
Komeleya Lêkolînên Çand û Ziman Avesta ya Îzmîrê, bi boneya 21ê Sibatê Roja Zimanê Dayikê ya Cîhanê li avahiya komeleya xwe çalakiyek li dar xist. Di çalakiya de ku bi beşdariya gelek kesan pêk hat, piştî axaftinên hevserokan, hunermendan bi stranên Kurdî reng da bernameyê.
Di çalakiyê de pankarta “21ê Sibatê roja zimanê dayikê ya cîhanî piroz be” hate vekirin û gelek caran dirûşma “Bê ziman jiyan nabe” hate berzkirin. Metna daxuyaniyê ji aliyê Hevserokê Komeleyê Ramazan Kaygisiz ve hat xwendin.
‘Bila astengiyên li ser Kurdî bên rakirin”
Ramazan Kaygisiz di daxuyaniya xwe de bal kişand ser pêvajoyên aşitî civaka demokratîk û bang li rayedarên dewletê kir û got: “Ji Cotmeha 2024an û vir ve hevdîtinên têne kirin girîng in. Daxwaza me ew e ku hemû astengiyên li ber çand, ziman û nasnameya Kurdî bêne rakirin. Divê statuya gelê Kurd û daxwaza perwerdehiya bi Kurdî bikeve meriyetê. Zimanê kurdî; hebûn, rûmet û nasnameya gelê Kurd e. Heya ku Kurdî li vê welatî nebe zimanê fermî û ji pêşdibistanê heta zanîngehê nebe zimanê perwerdehiyê, têkoşîna me ya parastina nirxên neteweyî dê berdewam bike. Zimanê me rûmeta me ye, zimanê me hebûna me ye.”
‘Eger ziman neyê axaftin dimire’
Piştî daxuyaniyê, Hevseroka Komeleya Avestayê Kurdiye Irgat jî axivî û bal kişand ser xetereya li ser Kurdî. Kurdiye Irgat destnîşan kir ku ziman mîna mirovan zindî ye û got: “Heke ziman neyê axaftin, dimire. Li gorî lêkolînên UNESCOyê, li cîhanê 7 hezar ziman hene û ji van 2 hezar û 500 ziman li ber windabûnê ne. Ji sala 1950yî ve 250 ziman tune bûne. Ev nîşan dide ku heke zimanê gelekî neyê naskirin, ew ziman winda dibe. Em wekî Avesta daxwaz dikin ku zimanê me bibe zimanê fermî û zimanê perwerdehiyê.”
Çalakî piştî şahiya stranan bi dawî bû.
